Расейская амбасада ў Бэніне пацьвердзіла, што ўсе шасьцёра чальцоў экіпажа грузавога судна, выкрадзеныя ў ноч на 2 студзеня — грамадзяне Расеі.
«У галоўным штабе вайскова-марскіх сіл Бэніну паведамілі, што ў ноч з 1 на 2 студзеня на судна MSC Mandy, якое знаходзілася недалёка ад тэрытарыяльных вод Бэніну, быў учынены пірацкі напад», — заявілі расейскія дыпляматы ў Рэспубліцы Бэнін.
Абставіны здарэньня высьвятляе і расейскае дыпляматычнае прадстаўніцтва ў суседняй Нігерыі.
Паводле расейскай амбасады ў Бэніне, на борце знаходзіліся 24 чальцы экіпажу: 23 — грамадзяне Расеі, адзін грамадзянін Украіны.
На борт уварваліся каля сямі–дзевяці чалавек, узброеных агнястрэльнай аўтаматычнай і халоднай зброяй.
Празь дзьве гадзіны бандыты пакінулі вадаплаў, выкраўшы шасьцёх чальцоў экіпажу, усе яны грамадзяне РФ (капітан, старэйшы памочнік капітана, 3-ці памочнік капітана, боцман, зварнік, кок), паведамляе ВВС.
MSC Mandy — кантэйнэравоз, які ішоў пад панамскім сьцягам. Зараз, паводле дадзеных партала Marinetraffic, вадаплаў стаіць на якары ў Гвінейскай затоцы.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў