Лінкі ўнівэрсальнага доступу

Беларуска, якая загінула ў Магнітагорску, была ў вайну снайпэрам, перажыла блякаду, — СМІ


Дом пасьля выбуху ў Магнітагорску

Найстарэйшай ахвяры выбуху ў жылым доме ў расейскім Магнітагорску было 95 гадоў, яна загінула разам з дачкой.

Беларускай, якая загінула падчас выбуху жылога дому ў Магнітагорску раніцай 31 сьнежня, аказалася 95-гадовая Вольга Мікітаўна Анісімава, вэтэран вайны, яна ўзнагароджана ордэнам Айчыннай вайны II ступені. Пра гэта распавяла парталу U24 яе ўнучка Надзея.

«Бабуля жыла ў акупацыі ў Ленінградзе, потым ваявала на лініі фронту, была снайпэрам. Не раз суправаджала машыны па „дарозе жыцьця“ ў блякадны горад. Дэмабілізавалася ў 1945 годзе ў званьні яфрэйтар. Мае мноства ўзнагародаў. Спакойная, разважлівая, вельмі любіла майго сына Яраслава, вучыла чытаць, пісаць. Дапамагала выхоўваць унукаў, сама плаваць ня ўмела, а іх навучыла. Ніколі ня скардзілася на здароўе, усё за нас перажывала».

Разам з Вольгай Анісімавай загінула яе 70-гадовая дачка, яны жылі разам.

Імя Вольгі Анісімавай значыцца ў сьпісе МНС Расеі, складзеным 31 сьнежня. Там гаворыцца, што яна нарадзілася 25 жніўня 1923 году ў вёсцы Бозак Асіповіцкага раёну Магілёўскай вобласьці. Ад восені 2010-га яна жыла ў Магнітагорску.

У Ліпеньскім сельсавеце карэспандэнту Свабоды паведамілі, што Вольга Анісімава не пражывала ў вёсцы Бозак. У дамавых і пагаспадарчых кнігах з 1952 году такое прозьвішча ня значыцца. Вяскоўцы, якім патэлефанавала Свабода, таксама не згадалі, што там жыла Вольга Анісімава.

Раніцай 31 сьнежня ў Магнітагорску Чалябінскай вобласьці Расеі адбыўся выбух, пасьля чаго абрынуліся канструкцыі аднаго з пад’ездаў 10-павярховага будынка. Пад заваламі знойдзена ўжо 37 целаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG