Лінкі ўнівэрсальнага доступу

Калі і чаму ў жылых дамах у Беларусі выбухаў газ


Дом пасьля выбуху ў Магнітагорску

У расейскім горадзе Магнітагорску Чалябінскай вобласьці выбухнуў бытавы газ, абваліўся пад'езд, загінулі больш за 20 чалавек. Свабода згадала выбухі і атручэньні газам у жылых дамах у Беларусі за апошнія 10 год. Зь якіх прычын яны здараліся і якія былі наступствы?

Раніцай 31 сьнежня ў Магнітагорску Чалябінскай вобласьці Расеі здарыўся выбух, паводле папярэдніх дадзеных — газу, пасьля чаго абрынуліся канструкцыі аднаго з пад’ездаў 10-павярховага будынка. Раніцай 1 студзеня ратавальнікі абвяшчалі, што часова прыпыняюць пошукавыя працы, бо вонкавая сьцяна, якая ня ўпала падчас выбуху, пагражае абвалам. Зьніклымі бязь вестак лічацца яшчэ каля 30 чалавек.

2018 год

17 студзеня, Берасьце. Ад выбуху ў прыватным доме на вуліцы 4-й Першамайскай павалілася частка сьцен, вылецела шкло з вокнаў, пачаўся пажар. Гаспадары не пацярпелі. Па вэрсіі МНС, прычынай выбуху было парушэньне правілаў эксплюатацыі газавых прыладаў і агрэгатаў.

11 ліпеня, Гомель. У кватэры на пятым паверсе жылога дома № 32 на вуліцы Менскай адбылася ўспышка газапаветранай сумесі на кухні. Выбіла шкло і вывернула раму вакна. Пацярпеў гаспадар кватэры.

27 кастрычніка, Жлобін. Бытавы газ выбухнуў у аднапакаёвай кватэры на сёмым паверсе дзевяціпавярховіка ў мікрараёне № 3. Паводле адной з вэрсій, прычынай здарэньня стала адкрытая фаерка газавай пліты. Выбухам у кватэры вынесла вокны і дзьверы, разбурыла сьцяну на кухні, тая абрынулася на суседзяў — мужа і жонку, якія ў гэты час спалі. Сусед атрымаў траўмы галавы. 25-гадовы гаспадар атрымаў апёкі ног 1–3 ступені (20% цела). З кватэр у пад’езьдзе дома эвакуавалі 19 чалавек.

Выбух дома ў Барысаве
Выбух дома ў Барысаве

4 сьнежня, Барысаў. Выбух у прыватным доме па вуліцы Адамовіча. Будынак практычна цалкам разбураны. 39-гадовы гаспадар атрымаў тэрмічныя апёкі і быў дастаўлены ў лякарню ў цяжкім стане. Таксама пацярпела школьніца, якая праходзіла ў гэты час каля дома, ёй аскепкамі шкла парэзала руку. Адна з вэрсій сьледзтва — выбух газапаветранай сумесі бытавога характару.

2016 год

27 студзеня, Барысаў. У «хрушчоўцы» ў былым вайсковым гарадку Барысава памерлі ад атручэньня газам шасьцёра чалавек зь дзьвюх кватэр. На службовых асобаў «Барысаўмежрайгаза» завялі крымінальную справу за неналежнае выкананьне службовых абавязкаў.

2013 год

23 лютага, Менск. У доме па вуліцы Пляханава, 85 у выходны дзень адбыўся выбух у двухпакаёвай кватэры на самым верхнім паверсе дзевяціпавярховіка. Двое загінулі. Вылецелі вокны, рухнулі сьценкі. Адсялялі ўвесь пад’езд і яшчэ чатыры кватэры суседняга пад’езда. Пяцёра чалавек пацярпелі. Маці і сын, якія і жылі ў кватэры, дзе прагрымеў выбух, загінулі. Выбух адбыўся з прычыны вялікай колькасьці газу ў жылых памяшканьнях. У Сьледчым камітэце казалі пра вэрсію суіцыду.

Дом на вуліцы Пляханава пасьля выбуху
Дом на вуліцы Пляханава пасьля выбуху

2012 год

8 лютага, Лагойскі раён. Выбух бытавога газу ў трохпавярховым інтэрнаце вёскі Малінаўка Лагойскага раёну: амаль поўнасьцю абрынуўся пад’езд дома, адзін чалавек загінуў, пацярпелі 14. Прычынай выбуху прызналі ўзгараньне газапаветранай сумесі, якая ўтварылася ў выніку працёку газу. Жыхары дома неаднаразова зьвярталася ў аварыйную службу, бо чулі, як пахне газам, у тым ліку і ў дзень выбуху, але там як мае быць не адрэагавалі.

Ілюстрацыйнае фота. Працёк газу
Ілюстрацыйнае фота. Працёк газу

2011 год

13 лютага, Дзяржынскі раён. Выбух бытавога газу ў аднапакаёвай кватэры на другім паверсе пяціпавярховіка ў пасёлку Энэргетыкаў. Былі пашкоджаныя міжкватэрныя перакрыцьці, выбітыя шыбы, у фасадзе дома ўтварылася вялізная дзірка. Гаспадара кватэры з апёкамі 30% цела шпіталізавалі. Выбух адбыўся з прычыны працёку газу.​

«У Беларусі адносна спакойна». Што рабіць, каб пазьбегчы бяды

Начальнік упраўленьня сыстэм газазабесьпячэньня «Белпалівагазу» Ўладзімер Русь сказаў карэспандэнту Свабоды, што пры той сыстэме эксплюатацыі і абслугоўваньня, якая дзейнічае ў Беларусі, можна адчуваць сябе «адносна спакойна».

Паводле Ўладзімера Руся, трэба выконваць правілы карыстаньня газам у быце, якія зацьверджаныя Саветам Міністраў. А таксама захоўваць правілы бясьпекі, якія газавікі тлумачаць, калі наведваюць грамадзян, і абавязкова праводзіць тэхабслугоўваньне.

«Тэхабслугоўваньне прыбораў і газаправодаў — гэта гарантыя нашай бясьпекі. То бок павінна быць выразнае выкананьне рэкамэндацый і абавязковае тэхабслугоўваньне. Гэта ня так складана і страшна, калі робяцца ўсе неабходныя захады.

Газавая гаспадарка сёньня ў Беларусі абслугоўваецца на патрэбным узроўні. У нас наладжана сыстэма прафіляктычнай працы, у тым ліку і тэхнічнай. Абавязковыя рэглямэнты працы.

Канечне, ад усяго нельга застрахавацца. Але пры той сыстэме, якая дзейнічае ў нас, па эксплюатацыі і абслугоўваньні, мы можам быць адносна спакойныя. Але асабліва расслабляцца няма сэнсу».

Уладзімер Русь згадвае толькі адзін выпадак выбуху газу ў жылым шматкватэрным доме — у Малінаўцы ў Лагойскім раёне. Тады парушэньні дапусьцілі арганізацыі газазабесьпячэньня.

«У нас былі спробы суіцыдаў, калі людзі самі загазоўвалі кватэру. Гэта прыводзіла да выбухаў, бо ў такіх выпадках дасягаецца небясьпечная канцэнтрацыя, калі здараецца выбух. І ратавала тое, што апэратыўна рэагавалі людзі, тэлефанавалі па нумары 104», — сказаў прадстаўнік «Белпалівагазу».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG