На нарвэскім арктычным архіпэлягу Шпіцбэрген паводле падазрэньня ва ўзброеным абрабаваньні банку затрыманы грамадзянін Расеі. Пра гэта ў суботу паведамляецца на сайце губэрнатара рэгіёну Свальбард.
Абрабаваньне адбылося ў пятніцу ў пасёлку Лонг’ір — адміністрацыйным цэнтры Шпіцбэргену. Яно прыцягнула ўвагу нарвэскай прэсы празь незвычайныя абставіны: архіпэляг Шпіцбэрген знаходзіцца за палярным кругам, там цяпер палярная ноч, насельніцтва архіпэлягу складае ўсяго некалькі тысяч чалавек, непрыкметна пакінуць яго і схавацца — вельмі цяжка. Паводле дадзеных нарвэскіх СМІ, учыненае расейцам абрабаваньне банку — першае ў гісторыі Лонг’іру.
Паведамляецца, што 29-гадовы грамадзянін Расіі, які, як мяркуецца, прыехаў на Шпіцбэрген як турыст, увайшоў у будынак банку і, пагражаючы вінтоўкай, вымусіў касіра выдаць яму наяўнымі каля 70 тысяч нарвэскіх кронаў (каля 8 тысяч даляраў ЗША). Вінтоўку ён узяў у арэнду — на Шпіцбэргене можна бесьперашкодна браць напракат зброю для абароны ад белых мядзьведзяў.
Супрацоўнікі банку выклікалі паліцыю, і расеец быў затрыманы праз 20 хвілін пасьля ўчыненьня злачынства. Ён адпраўлены на мацярык, у горад Тромсё, дзе зьмешчаны пад варту.
Архіпэляг Шпіцбэрген — сувэрэнная тэрыторыя Нарвэгіі, аднак паводле дамовы на ім вядуць гаспадарчую дзейнасьць (здабываюць вугаль) таксама расейскія кампаніі.