Уплывовыя амэрыканцы заклікалі прэзыдэнта ЗША Дональда Трампа павялічыць ціск на Расею за яе агрэсію ва Ўкраіне. Адкрыты ліст да кіраўніка Белага дома апублікаваў амэрыканскі аналітычны цэнтар CEPA.
Дакумэнт падпісалі 46 уплывовых аналітыкаў, экспэрты ў замежнай палітыцы, былыя чыноўнікі і паслы ЗША.
«Расея парушае адзін з найстарэйшых і самых сьвятых для Амэрыкі прынцыпаў: свабоду суднаходзтва ў міжнародных водах. Расея ня спыніцца, пакуль Захад не павысіць геапалітычную цану для яе», — гаворыцца ў лісьце.
Як адзначылі аўтары дакумэнту, інцыдэнт у Керчанскай пратоцы не адзінкавы — гэта толькі эпізод у пасьлядоўнай палітыцы Крамля.
«Расея па-ранейшаму імкнецца пашырыць анэксію, спрабуючы ўстанавіць кантроль над марской прасторай вакол паўвострава», — падкрэсьлілі аўтары дакумэнту.
Аўтары ліста ўпэўненыя, што ўсяго гэтага можна пазьбегнуць, калі павысіць для Расеі «цану агрэсіі».
Цалкам парады Трампу можна прачытаць тут.
Што трэба ведаць пра канфлікт Украіны і Расеі ў Азоўскім моры
Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.
- Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
- Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
- Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
- Ці праўда, што ўкраінскія караблі парушылі расейскую мяжу ў Азоўскім моры?
- Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.
Дзе ва Ўкраіне ўвялі ваеннае становішча - Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
- Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
- Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
- Украіна на час дзеяньня ваеннага становiшча забараніла ўезд у краіну мужчынам – грамадзянам Расеі ва ўзросьце ад 16 да 60 гадоў.
- У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.
