У Дзяржаўную думу Расеі ўнесены законапраект, які прыраўноўвае абразу прадстаўнікоў улады ў інтэрнэце да дробнага хуліганства.
Кіраўнік камітэту Савету фэдэрацыі па канстытуцыйным заканадаўстве Андрэй Клішас, яго першы намесьнік Людміла Бокава і намесьнік старшыні камітэту Дзяржаўнай думы па разьвіцьці грамадзянскай супольнасьці Дзьмітрый Вяткін прапануюць дапоўніць адміністрацыйны артыкул «дробнае хуліганства» нормай аб адказнасьці за распаўсюджваньне ў інтэрнэце матэрыялаў, «якія выказваюць відавочную непавагу да грамадзтва, дзяржавы, афіцыйных дзяржаўных сымбаляў, Канстытуцыі і органаў дзяржаўнай улады».
Згодна з кодэксам аб адміністрацыйных правапарушэньнях, дробнае хуліганства караецца штрафам ад 1 тысячы да 5 тысяч рублёў, альбо арыштам да 15 сутак.
У праекце таксама ўнесеныя папраўкі да закону «Аб інфармацыі, інфармацыйных тэхналёгіях і аб абароне інфармацыі», згодна зь якімі Генэральны пракурор і яго намесьнікі надзяляюцца правам зьвяртацца ў «Роскомнадзор» з патрабаваньнем пазасудовага блякаваньня матэрыялаў, якія абражаюць ўладу.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў