Упраўленьне Сьледчага камітэту Берасьцейскай вобласьці завяршыла расьсьледаваньне справы аб забойстве ў Івацэвіцкім раёне міліцыянта і замаху на забойства яшчэ аднаго.
Як паведамілі ў Сьледчым камітэце, «комплекснай судовай псыхоляга-псыхіятрычнай экспэртызай было ўстаноўлена, што абвінавачаны пакутаваў у момант учыненьня інкрымінаваных яму дзеяньняў і пакутуе цяпер на псыхічнае расстройства».
Таму, паведамілі сьледчыя, канчатковае абвінавачаньне стралку не выстаўлялася. Крымінальная справа перададзеная пракурору для накіраваньня ў суд, які мае разгледзець пытаньне аб прымяненьні да абвінавачанага прымусовых захадаў бясьпекі і лячэньня. Да таго меркавалася, што мужчыну можа пагражаць сьмяротнае пакараньне.
Сьледчы камітэт таксама абверг інфармацыю аб тым, што ў абвінавачанага з забітым міліцыянтам да здарэньня быў канфлікт.
«У пэрыяд расьсьледаваньня крымінальнай справы ў сродках масавай інфармацыі неаднаразова зьяўляліся розныя чуткі наконт браканьерства міліцыянта і быццам бы „цкаваньня“ абвінавачанага супрацоўнікамі. У ходзе расьсьледаваньня крымінальнай справы гэтая інфармацыя была правераная, аднак свайго аб’ектыўнага пацьверджаньня не знайшла», — паведамілі ў Сьледчым камітэце.
17 жніўня ў вёсцы Бабровічы Івацэвіцкага раёну мясцовы жыхар 1961 году нараджэньня страляў з ружжа па ўчастковым інспэктару міліцыі.
Паведамлялася, што міліцыянты прыйшлі да яго з плянавай праверкай умоваў захоўваньня зброі. У выніку адзін зь міліцыянтаў быў забіты на месцы, другі атрымаў раненьні.
Стралок быў зарэгістраваны паляўнічым і меў дазвол на нашэньне і захоўваньне паляўнічай зброі.
