Лінкі ўнівэрсальнага доступу

«Белавія»: У аварыі самалёта ў «Барыспалі» пацярпелых няма


Ілюстрацыйнае фота

Аварыя самалёта Boeing 737-500 кампаніі «Белавія» адбылася ўвечары 9 сьнежня падчас вырульваньня пасьля пасадкі ва ўкраінскім аэарапорце «Барыспаль» пад Кіевам.

Як расказалі Свабодзе ў авіякампаніі «Белавія», пацярпелых сярод пасажыраў і экіпажу няма. Уласна пасадка «прайшла штатна», здарэньне адбылося ўжо на зямлі. Самалёт атрымаў «нязначныя пашкоджаньні».

Цяпер праводзіцца расьсьледаваньне здарэньня. Паводле папярэдняй вэрсіі, расказалі ў кампаніі, самалёт «у час прабегу правай стойкай шасі закрануў грунт, камандзір карабля выправіў бакавое адхіленьне самалёта, пасьля чаго самалёт прадоўжыў рух па паласе і заруліў на стаянку».

Раней дырэктар «Барыспалю» расказваў, што аэрапорт «працуе ў штатным рэжыме». Паласу, на якой адбылася аварыя, на пэўны час закрывалі, каб ачысьціць. У час здарэньня праз умовы надвор’я быў «напружаны пэрыяд» у працы «Барыспалю», 11 самалётаў накіравалі ў іншыя аэрапорты. Два рэйсы «Белавія» з Барыспалю ў Нацыянальны аэрапорт Менск затрымалі прынамсі на 7 гадзінаў.

***

Падобная сытуацыя адбылася летась, 22 сьнежня, калі борт «Белавія» сышоў з паласы ў аэрапорце Барыспаль — падчас руху самалёт скаціўся з рулявой дарожкі на грунт адной стойкай шасі.

У 2008 годзе інцыдэнт зь беларускім самалётам здарыўся ў Ерэване. У ноч з 13 на 14 лютага, вылятаючы ў Менск, самалёт «Белавія» пры ўзьлёце сышоў з паласы, перавярнуўся на адно крыло і ўдарыўся ім аб зямлю. Адбыўся выбух, лайнэр разваліўся на дзьве часткі. З палаючага самалёта ўдалося эвакуяваць усіх 18 пасажыраў і траіх чальцоў экіпажу. Некалькі чалавек атрымалі раненьні рознай ступені цяжкасьці. Аварыя здарылася, бо самалёт ня быў апрацаваны вадкасьцю, якая ахоўвае яго ад абледзяненьня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG