Расея вінаватая беларускім кампаніям 450 мільёнаў даляраў

Суб’екты гаспадараньня Расеі вінаватыя беларускім прадпрыемствам 450 мільёнаў даляраў за выкананыя работы. Грошы ня выплачаныя па сёньняшні дзень, паведаміла Генэральная пракуратура Беларусі.

Сярод іншых дарожна-будаўнічае ўпраўленьне № 1 з гораду Рагачова Гомельскай вобласьці судзіцца з адміністрацыяй расейскага Ліпецку. Беларускія будаўнікі ў кастрычніку 2017 году абсыпалі некалькі вуліц гораду асфальтава-бэтоннай крошкай. За гэта павінны былі атрымаць больш за паўмільёна расейскіх рублёў. Паводле дамовы, ліпецкія чыноўнікі мусілі разьлічыцца цягам пяці дзён. З таго часу пайшоў ужо другі год, а грошы да Рагачова не дайшлі.

Прычына ў тым, што за гэта час заказчык правёў рэарганізацыю. Цяпер на рахунку новай арганізацыі няма ні грошай, ні маёмасьці, якую можна прадаць. Таму ўсе спадзяваньні рагачоўскіх будаўнікоў — на міжнародны арбітраж.

МЗС абяцае абараняць экспартэраў і інвэстараў

Усяго ж гаспадаркі Расеі за выкананыя работы і паслугі вінаватыя беларускім прадпрыемствам 450 мільёнаў даляраў. Намесьнік генэральнага пракурора Беларусі Аляксандар Лашын фактычна прызнаў, што яны выбылі з абароту і цяпер за іх судзяцца.

Пакуль удалося спагнаць толькі 5,3 мільёна даляраў з 450.

Гэты факт прагучаў падчас рэгіянальнай канфэрэнцыі аб міжнародным арбітражы ў Менску, якая пачалася 4 сьнежня.

Амаль 150 удзельнікаў з Азэрбайджану, Вялікай Брытаніі, Швэцыі ды шэрагу іншых краін зьехаліся ў Менск на двухдзённую канфэрэнцыю пад эгідай ААН.

Кіраўнік галоўнага дагаворна-прававога ўпраўленьня МЗС Беларусі Андрэй Мяцеліца патлумачыў зацікаўленасьць беларускіх уладаў у такой канфэрэнцыі жаданьнем абараняць экспартэраў беларускай прадукцыі і паслуг за мяжу і павялічваць замежныя інвэстыцыі:

«Наша міністэрства адказвае і за замежны гандаль, і за прыцягненьне інвэстыцыяў. Але міжнародны досьвед паказвае, што прырост інвэстыцыяў нярэдка выклікае і большую колькасьць спрэчак паміж тымі, хто ўкладае грошы і тымі, хто гэтымі інвэстыцыямі карыстаецца. Таму нам карысна будзе даведацца пра ўсе нюансы такіх сытуацыяў. А беларускія дыпляматы, якія працуюць за мяжой, атрымаюць дадатковыя веды, як абараняць інтарэсы экспартэраў беларускай прадукцыі».