Прэзыдэнт ЗША Дональд Трамп заявіў, што яго будучая сустрэча з расейскім прэзыдэнтам Уладзімірам Пуціным на палях саміту G20 у Аргентыне можа быць адмененая з прычыны захопу Расеяй украінскіх караблёў.
Пра гэта прэзыдэнт ЗША сказаў у інтэрвію газэце Washington Post 27 лістапада і заявіў, што цяпер чакае поўнай справаздачы па інцыдэнце ад сваіх памочнікаў.
«Ад гэтай справаздачы шмат у чым залежыць, ці адбудзецца наша гутарка. Магчыма, яе і зусім ня будзе. Гэты акт агрэсіі мне зусім не падабаецца», — сказаў Трамп.
Прэзыдэнт ЗША павінен быў сустрэцца з расейскім прэзыдэнтам у рамках саміту G20 у Буэнас-Айрэсе 30 лістапада і 1 сьнежня. Да гэтага Трамп і Пуцін сустракаліся ў ліпені ў Фінляндыі. Пасьля працяглых кансультацыяў бакі вырашылі адкласьці наступны поўнафарматны амэрыкана-расейскі саміт да наступнага году.
Заява Трампа зьявілася пасьля таго, як расейскі суд 27 лістапада на два месяцы арыштаваў 12 з 24 украінскіх маракоў, захопленых расейскімі сілавікамі. Пасьля суд у Керчы арыштаваў яшчэ трох параненых украінцаў. Маракоў абвінавачваюць у «незаконным перасячэньні дзяржаўнай мяжы Расеі». Украінская пракуратура прызнала іх ваеннапалоннымі.
Што трэба ведаць пра канфлікт Украіны і Расеі ў Азоўскім моры
Расея 25 лістапада заблякавала выхад украінскіх караблёў, якія плылі да Марыюпалю праз Керчанскі праліў, каб трапіць у Азоўскае мора. Тры ўкраінскія караблі і больш за 20 украінскіх маракоў захопленыя расейскімі вайскоўцамі.
- Раніцай 25 лістапада расейскі сухагруз перагарадзіў Керчанскую пратоку перад трыма ўкраінскімі суднамі, якія ажыцьцяўлялі плянавы пераход з порту Адэсы ў порт Марыюпаль Азоўскага мора. Пазьней расейскі пагранічны карабель пратараніў буксір Вайскова-марскіх сіл Узброеных сіл Украіны.
- Расейскія вайсковыя караблі з дапамогай авіяцыі і спэцназу атакавалі і захапілі пашкоджаны ўкраінскі буксір і два малыя браняваныя артылерыйскія катэры. Шэсьць украінскіх маракоў былі параненыя, двое зь іх у цяжкім стане.
- Паводле Расеі, украінскія караблі спрабавалі прайсьці празь Керчанскую пратоку незаконна. Украіна адкідае гэтае абвінавачваньне, спасылаючыся на міжнародныя і міжурадавыя пагадненьні.
- Ці праўда, што ўкраінскія караблі парушылі расейскую мяжу ў Азоўскім моры?
- Ва Ўкраіне абʼявілі ваеннае становішча з 28 лістапада да 27 сьнежня. Узброеныя сілы Ўкраіны прыведзеныя ў поўную баявую гатоўнасьць.
Дзе ва Ўкраіне ўвялі ваеннае становішча - Канфлікт у Азоўскім моры паміж Украінай і РФ узьнік пасьля ўвядзеньня ў эксплюатацыю моста ў анэксаваны Крым. Украіна заяўляе, што Расея на падставе праверак затрымлівае дзясяткі суднаў, якія ідуць ва ўкраінскія азоўскія парты. Паводле Масквы, праверкі ўкраінскіх суднаў законныя.
- Рада Бясьпекі ААН склікала 26 лістапада экстранае паседжаньне ў сувязі з рэзкім абвастрэньнем сытуацыі ў Керчанскім праліве, шэраг эўрапейскіх краінаў асудзілі дзеяньні Расеі ў Азоўскім моры.
- Суд Сімферопаля на два месяцы арыштаваў 24 украінскіх маракоў, захопленых расейскімі сілавікамі. Украінская пракуратура прызнала іх ваеннапалоннымі.
- Украіна на час дзеяньня ваеннага становiшча забараніла ўезд у краіну мужчынам – грамадзянам Расеі ва ўзросьце ад 16 да 60 гадоў.
- У верасьні 2019 году адбыўся абмен палоннымі паміж Расеяй і Ўкраінай, падчас якога захопленыя маракі вярнуліся ва Ўкраіну.
