У чацьвер у Менску згубіўся хлопчык з аўтызмам Коля Грамовіч, які не размаўляе. Ён ехаў дадому на 29-м тралейбусе, але прапусьціў свой прыпынак і зьнік. Выявілася, што дзіця так і каталася ў тым жа самым тралейбусе.
Калі бацькі забілі трывогу, валянтэры пошукава-выратавальнага атраду «Анёл» апэратыўна распаўсюдзілі інфармацыю, да пошукаў падключыліся грамадзяне, кіроўцы грамадзкага транспарту, дыспэтчары, таксісты.
Кіроўца таго самага тралейбуса Андрэй Міхнавец знайшоў хлопчыка ў салёне, пазнаў па апісаньні, паведаміў дыспэтчарам і, не адчыняючы дзьвярэй, не спыняючыся на прыпынках, давёз яго ад плошчы Мясьнікова да вуліцы Якуба Коласа і перадаў маці.
