Дзяржаўны абвінаваўца папрасіў прызначыць сяржанту Сяргею Крупу з 120-й асобнай мэханізаванай брыгады, які праходзіць абвінавачаным у справе аб гібелі салдата тэрміновай службы Дзьмітрыя Ўдода, 2 гады 6 месяцаў пазбаўленьня волі з адбываньнем пакараньня ў калёніі-пасяленьні, паведамляе БелТА.
Вайсковец абвінавачваецца ў парушэньні правілаў абыходжаньня са зброяй, што пацягнула па неасьцярожнасьці сьмерць чалавека. Сваю віну Сяргей Крупа прызнаў цалкам. Ад адваката на судзе ён адмовіўся.
Што здарылася на палігоне
Трагедыя адбылася 4 красавіка на палігоне непадалёк ад мікрараёну Ўручча пад Менскам. Падчас баявых заняткаў загінуў салдат Дзьмітры Ўдод, мэханік-кіроўца баявой машыны пяхоты, зь якой адпрацоўвалася стральба па мішэні з танкавага кулямёта Калашнікава.
Абвінавачаны, сяржант Сяргей Крупа, служыў апэратарам-наводчыкам на БПМ, якую вадзіў загінулы Дзьмітры Ўдод. Паводле Сяргея Крупы, стрэльбы 4 красавіка меліся прайсьці ў тры этапы, падчас якіх адпрацоўвалася ня толькі трапнасьць стральбы з кулямёта, але і хуткасьць, зь якой экіпаж разьмяшчаўся ў БМП і пакідаў машыну.
«Адстраляўшы стужку, наводчык павінен праверыць, ці не засталося ў кулямёце патронаў, паставіць кулямёт на засьцерагальнік, падняць угару ствол, далажыць камандзіру БМП, што стральба скончана», — расказаў суду сяржант Сяргей Крупа.
Так мусіла быць, але ў рэчаіснасьці гэты парадак аказаўся шмат дзе парушаны. У выніку перад чарговай стральбой пры зарадцы кулямёта той раптам стрэліў. Куля прайшла скрозь плячо і трапіла ў галаву мэханіка-кіроўцы Ўдода, які ў той момант займаў сваё месца ў БМП. Адзін стрэл стаў сьмяротным.
Дзьмітры Ўдод падчас навучаньня на мэханіка-кіроўцу служыў разам з Аляксандрам Коржычам у Печах і праходзіў як пацярпелы ў справе Коржыча. Аднак вэрсія пра датычнасьць сьмерці Дзьмітрыя Ўдода да справы Аляксандра Коржыча пацьверджаньня не знайшла.
