Лінкі ўнівэрсальнага доступу

«Падобна, што так»: Трамп лічыць што савудаўскі журналіст мёртвы


Джамаль Хашогджы

Прэзыдэнт ЗША Дональд Трамп заявіў, што савудаўскі журналіст Джамаль Хашогджы, «здаецца, сапраўды быў забіты». Такую заяву кіраўнік Белага дома зрабіў, адказваючы на пытаньні журналістаў на авіябазе Эндрус у Мэрылэндзе.

«Падобна, што так. Вельмі сумна», — сказаў Трамп.

Амэрыканскі прэзыдэнт паабяцаў, што савудаўскі ўрад будзе пакараны, калі сьледзтва вызначыць, што яны маюць дачыненьне да таго, што здарылася.

«[Адказ] павінен быць жорсткім, то бок, гэта вельмі, вельмі дрэнна. Паглядзім, што будзе далей, добра?» — сказаў прэзыдэнт.

За некалькі гадзінаў да гэтага Дональд Трамп размаўляў зь дзяржсакратаром ЗША Майкам Пампэа, які толькі вярнуўся з Савудаўскай Арабіі. У размове з журналістамі Пампэа таксама заявіў, што варта дачакацца канца расьсьледаваньня.

Вядомы журналіст з Савудаўскай Арабіі і крытык уладаў краіны Джамаль Хашокджы 2 кастрычніка зайшоў у консульства СА ў Турэччыне і зьнік. Турэцкія СМІ сьцьвярджаюць, што яго там катавалі і забілі. Каралеўства сваё дачыненьне адмаўляе, а Захад патрабуе расьсьледаваньня і пагражае санкцыямі.

Турэцкая паліцыя шукае парэшткі зьніклага бязь вестак савудаўскага журналіста ў лесе ў ваколіцах Стамбулу, а таксама ў адным з гарадоў на ўзьбярэжжы Мармуровага мора, паведамляе Reuters са спасылкай на шэраг афіцыйных крыніцаў.

Сьледчыя таксама выявілі «мноства сьлядоў» пасьля ператрусаў, праведзеных у будынку консульства і ў рэзыдэнцыі консула Савудаўскай Арабіі ў Стамбуле. Турэцкія ўлады пашырылі геаграфію пошукаў цела Хашокджы пасьля больш грунтоўнага вывучэньня маршрутаў і прыпынкаў аўтамабіляў, якія выяжджалі з тэрыторыі савудаўскага консульства 2 кастрычніка ў дзень зьнікненьня журналіста. Забойцы Хашокджы маглі пахаваць яго парэшткі ў найбуйнейшым стамбульскім лесапарку — Бялградзкім лесе. Яшчэ пошукі астанкаў вядуцца ў вёсцы побач з курортным горадам Ялова, за 90 км на поўдзень ад Стамбулу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG