Сырыйскія паўстанцы абверглі свой адыход з дэмілітарызаванай зоны паблізу гораду Ідліб. Пра гэта паведаміла агенцтва DPA са спасылкай на прадстаўнікоў паўстанцаў у нядзелю, 30 верасьня.
«Мы рашуча адмаўляем, што „Файлак аль-Шам“ пакінула свае пазыцыі на поўдні і захадзе правінцыі Алепа», — заявіў адзін з камандзіраў «Нацыянальнага фронту за вызваленьне», які ўваходзіць у пратурэцкую групоўку «Файлак аль-Шам».
Іншыя крыніцы ў лягеры паўстанцаў таксама абверглі сваё адступленьне. Пра адвод танкаў і буйнакалібэрных гармат з зоны паблізу Ідлібу раніцай паведамілі ў Сырыйскім цэнтры маніторынгу парушэньняў правоў чалавека, які базуецца ў Вялікай Брытаніі.
Вывад атрадаў паўстанцаў павінен быў праводзіцца ў адпаведнасьці з дамоўленасьцю прэзыдэнтаў Турэччыны і Расеі Рэджэпа Эрдагана і Ўладзіміра Пуціна, дасягнутай на нядаўняй сустрэчы ў Сочы.
Было вырашана стварыць 20-кілямэтровую дэмілітарызаваную зону ў сырыйскім горадзе Ідліб: да 15 кастрычніка вывесьці ўсе ўзброеныя сілы з гораду, да 10 кастрычніка павінна быць выведзена ўсё цяжкае ўзбраеньне. Тэрыторыю, паводле дамоўленасьцяў, будуць патруляваць турэцкія і расейскія вайскоўцы.
Ідліб — адна з апошніх тэрыторый Сырыі, якую не кантралююць сырыйскія ўрадавыя войскі: рэгіён знаходзіцца пад кантролем апазыцыі і ісламскіх узброеных груповак. Напярэдадні расейскія СМІ са спасылкай на Міністэрства абароны Расеі расказвалі пра хімічную атаку ў Ідлібе, якую нібыта рыхтуюць у якасьці правакацыі валянтэры «Белых касак» — арганізацыі грамадзянскай абароны на кантраляваных паўстанцамі тэрыторыях.
