Тэлеканал «Дождь» у нядзелю апублікаваў відэазапіс, на якім, як сьцьвярджаецца, зафіксаваныя зьдзекі са зьняволеных у калёніі нумар 7 гораду Омску. На запісе, у прыватнасьці, распранутыя дагала вязьні сядзяць на кукішках галовамі да сьцяны, затым танцуюць у парах.
«Дождж» сьцьвярджае, што запіс зроблены ў 2015 годзе, пра яго крыніцы тэлеканал не паведамляе. Акрамя запісу, тэлеканал публікуе сьведчаньні некалькіх былых зьняволеных гэтай калёніі. Яны сьцьвярджаюць, што падвяргаліся сэксуальнаму гвалту, катаваньням і зьдзекам з боку наглядчыкаў.
Пра тое, што вязьняў у калёніі нумар 7 прымушалі танцаваць голымі і пра існаваньне відэазапісу з гэтымі танцамі раней паведамляў сайт «Сибирь. Реалии» са спасылкай на адваката арганізацыі «Русь, якая сядзіць».
Паводле інфармацыі «Дажджу», на відэа зьняты інспэктар аддзелу бясьпекі калёніі нумар 7 Васілій Трафімаў, якога суд нядаўна прыгаварыў да двух гадоў калёніі за «перавышэньне паўнамоцтваў».
Раней вялікі рэзананс выклікала публікацыя відэа зьдзекаў зь вязьня ў яраслаўскай калёніі нумар 1. Пачалі зьяўляцца публікацыі пра зьдзекі ў яшчэ некалькіх калёніях.
Дэпутат Дзяржаўнай Думы Расеі Сяргей Шаргуноў на гэтым тыдні зьвярнуўся з просьбай правесьці праверку іншай омскай калёніі — нумар 10.
