На плянэце адначасова бушуюць два тайфуны, якія могуць стаць наймацнейшымі за гісторыю мэтэаназіраньняў.
Паводле зьвестак на вечар суботы, ад урагану «Флорэнс» у ЗША загінулі сама меней 13 чалавек, паведамляе «Нямецкая хваля» з спасылкай на амэрыканскія СМІ.
У штаце Паўночная Караліна рэкі выйшлі зь берагоў, вада паднялася да найвышэйшага за гісторыю штату ўзроўню. Месцамі выпала да 60 сантымэнтаў ападкаў, і мэтэаролягі пакуль не прагназуюць сканчэньня дажджоў, паведамляе УНІАН.
У зоне бедзтва жыве каля 10 мільёнаў чалавек.
Адначасова ў Азіі бушуе тайфун «Мангхут». У Філіпінах яго ахвярамі сталі як мінімум 25 чалавек. Большасьць зь іх загінулі ад апоўзьняў. Парывы ветру дасягалі больш як 200 км/г. Пазьней у суботу мэр паўночнага філіпінскага гораду Ітагон заявіў, што ў выніку тайфуну лічацца загінулымі да 100 чалавек, паведаміла агенцтва DPA.
У нядзелю тайфун дасягнуў Кітаю. У аэрапорце Ганконгу зафіксаваныя парывы больш як 150 км/г. Рэйсы адмененыя.