Лінкі ўнівэрсальнага доступу

У Гданьску трое палякаў зьбілі беларускую сям’ю


Ілюстрацыйнае фота. Польская паліцыя

Паліцыянты з Гданьска затрымалі 7 верасьня трох мужчын (49, 50 і 52 гадоў), якія па этнічных прыкметах зьневажалі і дыскрымінавалі суседзяў-беларусаў. Канфлікт паміж мужчынамі і беларусамі працягваўся з траўня 2018 году, калі сям’я зь Беларусі пераехала ў Гданьск, паведамляе польскае выданьне Gazeta Wybоrcza.

«Суседзі з самага пачатку ставіліся без сымпатыі да сям’і зь Беларусі. Ахвяры імкнуліся пазьбягаць канфліктаў з суседзямі, нягледзячы на гэта мужчыны абражалі і зьневажалі сям’ю», — расказвае выданьню асьпірант паліцыі Карына Каміньска з гарадзкой паліцыі.

У сераду мужчыны напалі на суседа зь Беларусі. Яны ўдарылі яго ў галаву, цягнулі за рукі, напалі на жонку, якая спрабавала дапамагчы мужу. Праз два дні нападнікаў арыштавалі.

Пракурор абвінаваціў 52-гадовага мужчыну ў дыскрымінацыі, зьнявазе паводле нацыянальнай прыкметы і пагрозах. Дваіх іншых палякаў дадаткова абвінавацілі ў нанясеньні цялесных пашкоджаньняў.

Ім пагражае да 5 гадоў пазбаўленьня волі.

У красавіку 2018 году група маладых палякаў з Голдапа (Вармінска-Мазурскае ваяводзтва) напала на сямёх беларусаў, якія жывуць і працуюць у гэтым горадзе. Хуліганы выкарысталі сьлезацечны газ, аднаго зь беларусаў зьбілі бутэлькай па галаве. Нападнікам пагражае да 7,5 года пазбаўленьня волі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG