Лінкі ўнівэрсальнага доступу

Расея: камандуючы Расгвардыяй паабяцаў зрабіць з Навальнага «адбіўную»


Віктар Золатаў.
Віктар Золатаў.

Кіраўнік Расгвардыі Віктар Золатаў выклікаў апазыцыянэра Аляксея Навальнага на «двубой», паабяцаўшы зрабіць зь яго «добрую сакавітую адбіўную».

Гэтак генэрал адказаў на публікацыю Фонду барацьбы з карупцыяй (ФБК) аб меркаваных парушэньнях пры закупцы ведамствам Золатава прадуктаў для службоўцаў.

У відэазвароце Золатаў назваў Навальнага «вырабам з амэрыканскай прабіркі», а яго заявы — «абразьлівымі, паклёпніцкімі разважаньнямі», якія «у афіцэрскім асяродзьдзі не прынята проста так дараваць».

Віктар Золатаў пры гэтым настойвае, што яго ведамства змагаецца з выяўленымі ў гвардыі выпадкамі карупцыі сумесна зь іншымі расейскімі сілавымі структурамі.

Сам Аляксей Навальны цяпер знаходзіцца пад арыштам — у канцы жніўня ён атрымаў 30 сутак за акцыю, праведзеную яшчэ зімой. Апазыцыянэр пакуль не пракамэнтаваў заяву Золатава.

Раней у Расгвардыі назвалі «сфальсыфікаванымі і правакацыйнымі» дадзеныя з расьсьледаваньня ФБК. Яго аўтары, паводле ведамства, не ўлічылі фактар сэзоннасьці закупак, калі параўноўвалі цэны на гародніну па дзяржаўных кантрактах, заключаных у сьнежні 2017 году і ў чэрвені 2018 году.

У расьсьледаваньні ФБК гаварылася, што прадукты для байцоў Расгвардыя купляе па моцна завышаных цэнах, а канчатковым бэнэфіцыярам афэра можа быць альбо «прэм’ер-міністар Мядзьведзеў, альбо людзі зь яго найбліжэйшага атачэньня».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG