Родныя і настаўнікі фіналістаў нацыянальнага адбору дзіцячай «Эўравізіі-2018» зьвярнуліся ў Белтэлерадыёкампанію з патрабаваньнем адкрыць пратаколы галасаваньня, піша Tut.by. Бацька прадстаўніка Беларусі на конкурсе з гэтым згодны.
Што адбылося?
У фінале беларускага адбору на «Эўравізію-2018» 1 верасьня з 16 баламі перамог Даніэль Ястрэмскі.
Пераможцу выбіралі па суме галасоў, атрыманых ад гледачоў (праз званкі і СМС) і прафэсійнага журы. Паводле афіцыйных падлікаў, гледачы аддалі Ястрэмскаму найбольшую колькасьць галасоў (9237 галасоў, 12 балаў), а журы — 4 з 12 магчымых балаў.
Найбольшую колькасьць балаў журы аддало Мікіту Бялько, які стаў апошнім паводле афіцыйных вынікаў галасаваньня гледачоў (906 галасоў).
Прадстаўнікі сямі зь дзесяці фіналістаў падрыхтавалі зварот у Белтэлерадыёкампанію, у якім заявілі, што ня згодныя з вынікамі праведзенага галасаваньня.
Паводле ліста, прычынамі звароту сталі:
- Накрутка смс-галасаваньняў. Магчымасьць для фінансава забясьпечаных удзельнікаў аплаціць неабмежаваную колькасьць галасоў.
- Падазрэньне ў падтасоўцы галасаваньня сяброў журы з мэтай забясьпечыць перамогу загадзя вызначанага ўдзельніка.
Пад адкрытым лістом падпісаліся 18 чалавек. Ліст накіравалі старшыні Белтэлерадыёкампаніі Івану Эйсманту і ў Адміністрацыю прэзыдэнта Беларусі.
У Белтэлерадыёкампаніі сказалі, што ліст разглядае кіраўніцтва.
Чаго патрабуюць аўтары звароту?
1. Адкрыць пратаколы галасаваньняў журы і гледачоў.
- Аргумэнтаваць выстаўленыя адзнакі згодна з крытэрамі дзіцячай «Эўравізіі».
- У выпадку неабходнасьці правесьці адкрытае перагаласаваньне па адзьнятым матэрыяле.
2. Паколькі штогадовае галасаваньне журы непразрыстае, распрацаваць сыстэму галасаваньня «з максымальнай адкрытасьцю».
У выпадку непрыманьня мераў аўтары звароту будуць зьвяртацца ў Эўрапейскі вяшчальны саюз і ЮНЭСКО з просьбай разабрацца ў сытуацыі.
Бацька Даніэля Ястрэмскага Аляксандар кажа, што ня супраць, калі вынікі галасаваньняў гледачоў і журы апублікуюць.
Дзіцячая «Эўравізія-2018» пройдзе ў Менску 25 лістапада. Папярэдні раз пляцоўка «Менск-Арэны» прымала конкурс у 2010 годзе.
У 2016 годзе Белтэлерадыёкампанія заявіла, што пытаньні аб галасаваньні трэба накіраваць у Белтэлекам.
Спраўдзіць, ці дазволена шмат разоў галасаваць з аднаго нумара і ці прадугледжаныя нейкія санкцыі за накруткі, немагчыма — у правілах нацыянальнага адбору пра наяўнасьць ці адсутнасьць абмежаваньняў на колькасьць галасоў з аднаго нумара не гаворыцца.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў