Цьвярскі суд Масквы асудзіў расейскага апазыцыянэра Аляксея Навальнага на 30 сутак арышту. Гэта ўжо другі арышт палітыка на працягу 2018 году. Першы раз 30 сутак Навальнаму прысудзілі ў траўні — за арганізацыю акцыі «Ён нам не цар».
Гэтым разам апазыцыйнага палітыка абвінавацілі ў «паўторным парушэньні правілаў правядзеньня публічнага мерапрыемства», а менавіта ў арганізацыі 28 студзеня «забастоўкі выбарнікаў».
У пачатку слуханьняў абарона Навальнага папрасіла час азнаёміцца са справай, бо яна ўключала ў сябе 219 старонак і 5 дыскаў зь відэазапісамі. Судзьдзя вылучыў на гэта адвакатам і падсуднаму толькі паўгадзіны.
Пазьней абарона падала хадайніцтва аб выкліку ў суд паліцыянітаў, якія затрымлівалі Навальнага і якія складалі на яго пратакол, а таксама запатрабавала спыніць справу, бо ў пратаколе затрыманьня не адзначана, якія менавіта дзеяньні палітыка паліцыя палічыла правапарушэньнем. Абодва гэтыя хадайніцтвы судзьдзя адхіліў.
У канцы слуханьняў Аляксей Навальны заявіў, што не сумняваецца ў абвінаваўчым рашэньні судзьдзі і лічыць, што ўся справа зладжаная выключна для таго, каб перашкодзіць яму ўдзельнічаць ва усерасійскай акцыі супраць павышэньня пэнсійнага ўзросту. Палітык заявіў яе на 9 верасьня.
У панядзелак жа стала вядома, што Міністэрства юстыцыі Расеі чарговы раз адмовіла ў рэгістрацыі партыі «Расея Будучыні», якую Навальны арганізаваў са сваімі прыхільнікамі. Гэтым разам міністэрства спаслалася на недахоп дакумэнтаў.
Зарэгістраваць сваю партыю Аляксей Навальны спрабуе ўжо шосты год — раней пад назвамі «Народны Альянс» і «Партыя Прагрэсу».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў