Лінкі ўнівэрсальнага доступу

БелаПАН для Алеся Ліпая быў сям’ёй і жыцьцём


Алесь Ліпай (справа) на вясельлі Віталя Цыганкова (зьлева). Сакавік 1992 году
Алесь Ліпай (справа) на вясельлі Віталя Цыганкова (зьлева). Сакавік 1992 году

Цяпер, даведаўшыся пра сьмерць Алеся Ліпая, я гляджу відэакадры з майго вясельля ў сакавіку 1992 году, дзе Алесь як мой блізкі сябра быў госьцем.

Алесь Ліпай, 1991 год
Алесь Ліпай, 1991 год

Алесь бярэ мікрафон і гаворыць, як ён рады, што ў БелаПАНскай сям‘і папаўненьне. «І з кожным годам наша агенцтва будзе расьці за кошт нашых сем‘яў і нашых дзяцей». У гэтым быў увесь Алесь Ліпай. Ён успрымаў БелаПАН як галоўную справу свайго жыцьця, як сям’ю, якая павінна расьці і павялічвацца.

Мы заснавалі БелаПАН восеньню 1991 году. СССР развальваўся, а два маладыя чалавекі, сышоўшы са сваёй працы ў «Знамени юности», заснавалі першае ў краіне незалежнае агенцтва навінаў, якое ня проста выжыла, а на доўгія гады стала сымбалем незалежнай журналістыкі ў Беларусі.

Дарэчы, некаторыя людзі, якія зьбіраліся пайсьці з намі ў новае агенцтва, ў апошні момант перадумалі.

Памятаю, як мы доўга прыдумвалі назву, і раптам у нейкі дзень Алесь кажа: «Назва ёсьць — БелаПАН (Беларускае прыватнае агенцтва навінаў)». І я проста ў захапленьні ад таго, наколькі ўдалая і яркая гэта назва.

Першыя месяцы былі асабліва цяжкія, мы часам плацілі супрацоўнікам заробкі са сваіх уласных сродкаў. Але ў Алеся заўсёды была ўпэўненасьць, што ўсё будзе добра, і БелаПАН выжыве, і зойме свой «пачэсны пасад» сярод беларускіх СМІ. І гэтую ўпэўненасьць ён падмацоўваў сваёй нястомнай працай, энэргіяй і адданасьцю справе.

Нашыя творчыя шляхі даволі хутка разышліся, але той год працы ў БелаПАНе для мяне назаўсёды застанецца, бадай, адным з самых яркіх эпізодаў у творчай біяграфіі. Дзякуй за гэта, Алесь. Ад усёй Беларусі і ад мяне асабіста.

  • 16x9 Image

    Віталь Цыганкоў

    Віталь Цыганкоў скончыў факультэт журналістыкі БДУ. Адзін з двух заснавальнікаў першага недзяржаўнага агенцтва навінаў БелаПАН. Працаваў ў газэтах «Звязда», быў карэспандэнтам у Беларусі расейскай «Независимой газеты», Associated Рress, аглядальнікам у газэце «Свабода». На беларускай Свабодзе ад 1994 году. Карэспандэнт расейскай Свабоды ў Беларусі.
     

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG