Расейскія ўлады дазволяць сьледчым з Польшчы агледзець абломкі самалёта прэзыдэнта Леха Качыньскага, які разьбіўся пад Смаленскам. Пра гэта сёньня заявіла журналістам афіцыйны прадстаўнік Сьледчага камітэта Расеі Сьвятлана Пятрэнка.
Паводле яе слоў, ад «кампэтэнтных органаў» у Польшчы паступіў запыт на правядзеньне працэсуальных дзеяньняў на расейскай тэрыторыі.
Аднак непасрэдна аглядаць агрэгаты і элемэнты канструкцыі самалёта будуць не палякі, а расейскія сьледчыя ў прысутнасьці польскіх калег. А потым вынікі будуць перададзены польскаму боку «ва ўстаноўленым заканадаўствам парадку», заявілі ў Сьледчым камітэце.
У красавіку 2018 года польская камісія па расьсьледаваньні катастрофы пад Смаленскам апублікавала новую справаздачу, у якой гаварылася, што асноўнай прычынай крушэньня стаў выбух на борце самалёта Качыньскага. Пазьней польскія сьледчыя заявілі, што знайшлі сьляды выбухоўкі на абломках самалёта і целе адной з ахвяр. У справаздачы, апублікаваным у 2011 годзе, гаварылася пра памылкі экіпажа. Гэты дакумэнт быў ануляваны.
10 красавіка 2010 года ў выніку катастрофы польскага самалёта Ту-154М пад Смаленскам загінулі 96 чалавек. У іх ліку быў прэзыдэнт краіны Лех Качыньскі. Расьсьледаваньне трагедыі працягваецца да гэтага часу. Расейскія ўлады называлі прычынай крушэньня памылку пілёта.
