Лінкі ўнівэрсальнага доступу

Адвакат Трампа гатовы гаварыць са сьледчымі ў справе ўмяшаньне Расеі ў выбары ў ЗША


U.S. -- Michael Cohen, former personal lawyer for U.S. President Donald Trump, leaves federal court in New York, August 21, 2018

Былы асабісты адвакат прэзыдэнта ЗША Дональда Трампа Майкл Коэн мае інфармацыю «ў некаторых пытаньнях, якія павінны быць цікавыя» спэцыяльнаму пракурору, што расьсьледуе сувязі паміж Расеяй і Трампавай выбарчай кампаніяй 2016 году, заявіў ягоны адвакат.

Адвакат сказаў, што Майкл Коэн гатовы даць інфармацыю ня толькі спэцыяльнаму пракурору Робэрту Мюлеру, але і камітэтам Кангрэсу, якія расьсьледуюць намаганьні Расеі ўмяшацца ў амэрыканскія выбары.

Прапанова прагучала пасьля таго, як былы «рамонтнік» Трампа прызнаў сябе вінаватым у прыхаваньні грашовых выплатаў — нібыта на ўказаньне Трампа — жанчынам, якія сьцьвярджалі, што мелі стасункі з Трампам, каб пераканаць іх маўчаць падчас выбарчай гонкі 2016 году.

Як паведамляюць амэрыканскія СМІ, Коэн гатовы сказаць Мюлеру, што Трамп ведаў загадзя пра сустрэчу ў нью-ёрскім Trump Tower у 2016 годзе, на якой яго старэйшы сын хацеў здабыць кампрамат на Гілары Клінтан ад расейскага адваката.

Чальцы камітэту Сэнату ў пытаньнях выведкі з Рэспубліканскай і Дэмакратычнай партыяў ужо заявілі, што яны «нядаўна ўзнавілі кантакт» з Коэнам у гэтым пытаньні.

У сэрыі тэлевізійных інтэрвію адвакат Коэна Лені Дэйвіс таксама сказаў, што Коэн можа распавесьці Мюлеру, ці ведаў і ці заахвочваў Трамп расейскае хакерскае ўмяшаньне ў электроннае ліставаньне Дэмакратычнай партыі ў часе выбарчай кампаніі 2016 году.

Прэс-сакратарка Белага дому Сара Сандэрс, калі яе спыталі, ці Трамп занепакоены тым, што Коэн мог бы сказаць Мюлеру, адказала:

«Я ня думаю, што прэзыдэнт занепакоены наагул. Ён ведае, што ён не зрабіў нічога дрэннага і што не было ніякай змовы».

Коэн у судзе 21 жніўня прызнаў сябе вінаватым і заявіў, што Трамп накіраваў яго арганізаваць выплату $130 000 порназорцы Стормі Дэніелс і $150000 былой мадэлі Playboy Карэн Макдугал, каб купіць іхнае маўчаньне перад выбарамі. Трамп адмаўляе стасункі зь імі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG