Два раённыя суды Віцебску адначасова скасавалі працэсы над актывісткамі Аленай Янушкоўскай і Ірынай Захаравай, прызначаныя на 23 жніўня. Актывістак мелі судзіць за ўдзел у курапацкай варце паводле адміністрацыйнага артыкула 23.34 «Парушэньне парадку арганізацыі або правядзеньня масавых мерапрыемстваў».
Сьпярша суд не хацелі пераносіць, а потым — адмянілі
Ірына Захарава перакананая, што суды скасаваныя паводле распараджэньня «зьверху»:
«21 жніўня я тэлефанавала ў Першамайскі райсуд і прасіла, каб мой працэс перанесьлі. Якраз на раніцу 23-га я запісалася на прыём да намесьніка старшыні аблвыканкаму і баялася спазьніцца ў суд. Тады мне казалі, што гэта аніяк немагчыма, бо дзень і час ужо прызначаныя. Але ж 22-га па абедзе з суду патэлефанавалі, што працэс касуецца. Маўляў, суд ня мае дастатковых доказаў маёй вінаватасьці».
Алене Янушкоўскай таксама патэлефанавалі з суду Віцебскага раёну і паведамілі, што судовы працэс супраць яе скасаваны.
«Нас з Ірынай павінны былі судзіць у адзін час: у 9.30. І літаральна хвіліна ў хвіліну спавясьцілі пра скасаваньне працэсаў. Мы ўжо падрыхтавалі прамовы пра тое, што судзіць абаронцаў Курапатаў у Эўрапейскі дзень памяці ахвяр сталінізму і нацызму — гэта вяршыня цынізму і бяспамяцтва. Але судам, падобна, пра гэта нагадалі і бяз нас», — сказала актывістка.
Эўрапейскі дзень памяці ахвяр сталінізму і нацызму адзначаецца 23 жніўня, у дзень падпісаньня дамовы аб ненападзе паміж Нямеччынай і Савецкім Саюзам, «які падзяліў Эўропу на сфэры ўплыву». Ён быў абвешчаны Эўрапейскім парлямэнтам 2 красавіка 2009 году.
У гэты дзень у Эўропе ўспамінаюць ахвяраў як нацызму, так і камунізму, ураўняўшы, такім чынам, абодва гэтыя антычалавечыя таталітарныя рэжымы.
Дзе і як будуць шукаць доказы вінаватасьці, не сказалі
Абедзьвюх актывістак папярэдзілі, што іх могуць выклікаць у суд зноўку — у верасьні. Але якія захады будуць зьдзейсьненыя, каб здабыць дадатковыя доказы іх віны, не сказалі.
Пратаколы на актывістак БХД былі складзеныя 8 жніўня. У той дзень машыну з чатырма віцебскімі актывістамі тройчы затрымлівалі па дарозе ў Курапаты. На зваротным шляху машыну таксама затрымалі — ужо на выезьдзе зь Менску. У пастарунку ў Бараўлянах на дзьвюх актывістак склалі пратаколы паводле артыкула 23.34 КаАП («Парушэньне парадку арганізацыі або правядзеньня масавых мерапрыемстваў»).
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў