Пра гэта паведамляе расейскае агенцтва «Новости». Подпісы пад дакумэнтам паставілі міністар абароны Расеі Сяргей Шайгу і яго калега з ЦАР Мары Наэль Каяра. Па словах цэнтральнаафрыканскага міністра, войска краіны «цалкам разбуранае» і трэба аднавіць яго баяздольнасьць.
Шайгу адзначыў, што ў Расеі лічаць ЦАР пэрспэктыўным партнэрам.
Раней міністэрства замежных справаў РФ паведаміла, што ў пачатку году Масква бясплатна адправіла ў ЦАР стралковую зброю і боепрыпасы, а таксама разьмясьціла там цывільных і вайсковых інструктараў для падрыхтоўкі мясцовых вайскоўцаў. Гэта было зроблена «у строгай адпаведнасьці з патрабаваньнямі рэжыму санкцыяў Рады бясьпекі ААН у дачыненьні да гэтай краіны», адзначалася ў паведамленьнях расейскага МЗС.
У чэрвені француская газэта Le Monde пісала пра прыбыцьцё ў ЦАР пяці кадравых вайсковых выведнікаў і 170 цывільных інструктараў — фармальна для падрыхтоўкі мясцовых вайскоўцаў. Аднак, як заявілі газэце экспэрты, гаворка ідзе пра «расейскіх наймітаў» з «прыватнай вайсковай кампаніі Вагнера», якую СМІ зьвязваюць зь Яўгеніем Прыгожыным, сябрам прэзыдэнта Расеі Ўладзіміра Пуціна.
30 ліпеня ў ЦАР былі забітыя трое расейцаў: журналіст Архан Джэмаль, рэжысэр Аляксандар Растаргуеў і апэратар Кірыл Радчанка. Яны здымалі дакумэнтальную стужку аб дзейнасьці ў краіне кампаніі Вагнера.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў