Лінкі ўнівэрсальнага доступу

Лукашэнка: Нас яшчэ Бог беражэ за кошт гэтай «дыктатуры» і аўтарытарызму


Аляксандар Лукашэнка падчас паездкі ў Гомель, 10 жніўня 2018.

Аляксандр Лукашэнка наведаў у Гомелі абласную дзіцячую клінічную бальніцу пасьля рэканструкцыі. «Пабудавалі палац, інакш ня скажаш. Высокія тэхналёгіі, выдатная бальніца», — заяву кіраўніка дзяржавы цытуе прэсавая служба прэзыдэнта.

Падчас размовы з жыхарамі Гомеля Аляксандар Лукашэнка гаварыў пра важнасьць забесьпячэньня высокай якасьці мэдыцынскіх паслуг з улікам сучасных экалягічных выклікаў, нават без уліку чарнобыльскай праблематыкі. «Асабліва ў Эўропе, у Расеі, ва Ўкраіне і г. д. Нас яшчэ Бог беражэ за кошт гэтай "дыктатуры" і аўтарытарызму, за што нас крытыкуюць, — сказаў Лукашэнка. — Але экалёгія пагаршаецца, і дзеці ня ўсе нараджаюцца без паталёгіі».

Прыляцеў верталётам. Лукашэнка прыбыў у Гомель з другой спробы

Паводле прэс-службы кіраўніка Беларусі, Лукашэнка наведаў розныя корпусы і блёкі бальніцы, азнаёміўся з узроўнем аказаньня мэдыцынскай дапамогі, пагутарыў з мэдпэрсаналам і бацькамі маленькіх пацыэнтаў. Як запэўнілі кіраўніка дзяржавы, патэнцыялу бальніцы дастаткова для якаснага ахопу неабходнай мэддапамогай ня толькі жыхароў абласнога цэнтра, але і ўсяго рэгіёну. Лукашэнка таксама даручыў апэратыўна ліквідаваць і некаторыя недапрацоўкі па абсталяваньні бальніцы самым сучасным абсталяваньнем і тэхнікай, частка зь якіх пакуль яшчэ не пастаўленыя. «Гэта павінен быць супэрцэнтар, і абсталяваньне павінна адпавядаць», — заявіў ён.

Гэтаму візыту папярэднічалі масавыя затрыманьні мэдыкаў у Беларусі. Ужытыя розныя меры стрыманьня ў дачыненьні да 37 службовых асобаў. Усяго ў «справе мэдыкаў» фігуруюць звыш 60 чалавек. Усе яны, як сьцьвярджаюць у КДБ, неаднаразова атрымлівалі незаконныя грашовыя ўзнагароды за садзейнічаньне ў пастаўцы мэдабсталяваньня і мэдыцынскіх прэпаратаў па завышаных цэнах. Усім прыцягнутым да крымінальнай адказнасьці, за выключэньнем апошніх затрыманых, выстаўленыя абвінавачаньні паводле крымінальных артыкулаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG