Лінкі ўнівэрсальнага доступу

Арсэнал «ЛНР — ДНР». Як выглядае «армія» баевікоў на пятым годзе вайны


Выстава ўзбраеньня данбаскіх сэпартыстаў, якое было захопленае падчас баявых дзеяньняў
Выстава ўзбраеньня данбаскіх сэпартыстаў, якое было захопленае падчас баявых дзеяньняў

Расейскі друк апублікаваў новыя дадзеныя аб ваеннай тэхніцы, якая ёсьць на ўзбраеньні груповак баевікоў «ЛНР» і «ДНР». Колькасьць атрыманай ад Расеі тэхнікі ўражвае. Па падліках журналістаў, у баевікоў — сотні танкаў, бронемашын і артылерыйскіх установак. Але наколькі гэтыя лічбы адпавядаюць рэчаіснасьці? Што з сябе ўяўляюць гэтыя групоўкі на пятым годзе вайны? І да чаго яны рыхтуюцца? Адказы — у матэрыяле журналістаў спэцыяльнага праекту Радыё Свабода «Донбасс. Реалии».

Узброеныя сілы груповак «ЛНР» і «ДНР» складаюцца зь першага і другога «армейскіх карпусоў», якія дзейнічаюць у Данецкай і Луганскай абласьцях. Паводле ўкраінскай выведкі, сёньня іх агульная колькасьць дасягнула амаль 35 000 чалавек.

У Галоўным упраўленьні выведкі Мінабароны Ўкраіны сьцьвярджаюць, што ў кіроўным складзе «карпусоў» мясцовых жыхароў няма ўжо даўно.

«Каля 750 кадравых афіцэраў і генэралаў Узброеных сіл Расеі на сёньняшні дзень займаюць кіроўныя пасады ў першым і другім „армейскіх карпусах“. Гэта найбольш важныя пасады» — расказаў у камэнтары Радыё Свабода прадстаўнік ГУР Украіны Вадзім Скібіцкі.

Баевікі першага і другога «армейскіх карпусоў» падзеленыя на 9 «брыгад», 5 асобных «палкоў», 14 «батальёнаў», асобныя «роты» і «батальёны тэрытарыяльнай абароны».

«Гэта звычайныя "сухапутныя злучэньні". Іх узбраеньне сфармавана па ўзоры савецкай або расейскай арміі» — кажа экспэрт Цэнтру дасьледаваньняў арміі, канвэрсіі і раззбраеньня Ігар Федзік.

Узбраеньне баевікоў у лічбах

У вайсковай выведцы Ўкраіны падлічылі: на ўзбраеньні баевікоў зараз 475 танкаў, каля тысячы (948) баявых браніраваных машын, 762 артылерыйскіх сыстэм і больш за 200 (208) рэактыўных сыстэм залпавага агню. Такім чынам колькасьць танкаў на ўзбраеньні баевікоў перавышае аналягічныя паказчыкі армій такіх краін-чальцоў NATO, як Вялікабрытанія, Нямеччына ці Францыя.

«Ваенная выведка разглядае гэтыя два „корпусы“ як складовую частку групоўкі, якую Расея разгарнула на нашым данецкім кірунку. Сыстэма кіраваньня зьвязаная і непасрэдна замыкаецца на Паўднёвай вайсковай акрузе — гэта па-першае. Па-другое, усё што тычыцца кіраваньня, падрыхтоўкі, забесьпячэньня і наогул арганізацыі паўсядзённай дзейнасьці — гэта робіцца з Паўднёвай вайсковай акругі РФ» — тлумачыць прадстаўнік ГУР Украіны Вадзім Скібіцкі.

Хоць аснову ўзбраеньня «армейскіх карпусоў» груповак «ЛДНР» складае яшчэ савецкая тэхніка, ня рэдкасьць на акупаваных тэрыторыях і сучаснае расейскае ўзбраеньне. За чатыры гады вайны валянтэрская супольнасьць InformNapalm зафіксавала на Данбасе 44 узоры расейскай тэхнікі, якія ніколі не былі на ўзбраеньні Узброеных сіл Украіны.

Міхайло Макарук, прадстаўнік супольнасьці Informnapalm
Міхайло Макарук, прадстаўнік супольнасьці Informnapalm

«Першае — гэта так званая ваенная тэхніка масавага выкарыстаньня. Гэта як вайсковыя цягачы, накшталт найноўшых Камазаў «Мустанг», гэтак і БРТ-82. Другі клястэр — гэта тэхніка, якая выкарыстоўваецца толькі расейскімі вайскоўцамі. Яскравым прыкладам зьяўляецца выкарыстаньне беспілётных лятальных апаратаў тыпу «Гранат-1», «Гранат-2». Трэці тып — гэта досыць дарагая і тэхналягічная зброя, гэта ўжо комплексы РЭБ, комплексы разьмініраваньня. Тут мы гаворым пра «Житель», «Свет-КУ», «Ртуть-БМ», комплекс «Борисоглебск», — кажа сьпікэр супольнасьці Informnapalm Міхайла Макарук.

Расейцы сярод баевікоў

Ва ўкраінскай ваеннай пракуратуры заяўляюць, што колькасьць расейцаў у групоўках дасягнула 11 тысячаў, пры гэтым тры тысячы — гэта кадравыя расейскія вайскоўцы. Валянтэры за час канфлікту ідэнтыфікавалі прадстаўнікоў больш за 90 розных ваенных падразьдзяленьняў Расеі.

«Гэта як асобныя вайсковыя часткі, гэтак і злучэньні, а таксама асобныя батальёна-тактычныя групы, якія былі сфармаваныя на тэрыторыі Расеі і былі перасунутыя на тэрыторыю Ўкраіны. Мы фіксавалі часткі СПА, марской пяхоты, Ваенна-марскога флёту, войскаў сувязі, сухапутных войскаў, войскаў спэцыяльнага прызначэньня Галоўнага ўпраўленьня разьведкі» — працягвае Міхайла Макарук.

Раней у СБУ заяўлялі, што ім вядома пра амаль дзьве сотні (195) трэніровачных баз, дзе праходзілі падрыхтоўку баевікі: 54 зь іх — у Расеі, 30 — на тэрыторыі акупаванага Крыму і 111 на падкантрольных групоўкам «ЛДНР» тэрыторыях. Прадстаўнікі ваеннай разьведкі заяўляюць, што цяпер вайсковыя карпусы ўзмоцнена праводзяць навучаньне і гатовыя да актыўных баявых дзеяньняў.

Трэніровачныя базы баявікоў - дадзеныя ўкраінскай выведкі
Трэніровачныя базы баявікоў - дадзеныя ўкраінскай выведкі

«Іх узровень досыць высокі. Ёсьць навучальныя цэнтры, палігоны ў кожнай брыгадзе, у кожным палку, дзе ўвесь час праходзяць мерапрыемствы баявой падрыхтоўкі. Гэта зладжваньне „узводаў“, „рот“, правядзеньне баявых стрэльбаў танкавых „падразьдзяленьняў“, артылерыйскіх, падрыхтоўка снайпэраў» — кажа прадстаўнік ГУР Украіны Вадзім Скібіцкі.

Экспэрт Цэнтру дасьледаваньняў арміі, канвэрсіі і раззбраеньня Ігар Федзік да гэтага дадае: гэтага цалкам можа хапіць для наступу.

Ігар Федзік, экспэрт Цэнтру дасьледаваньняў арміі, канвэрсіі і раззбраеньня
Ігар Федзік, экспэрт Цэнтру дасьледаваньняў арміі, канвэрсіі і раззбраеньня

«І колькасьць асабовага складу, і колькасьць вайсковай тэхнікі і ўзбраеньня зьяўляюцца дастатковымі для таго, каб наступаць на нейкім пэўным кірунку. Усё залежыць ад таго, якая ім будзе паступаць каманда: калі паступіць зьверху каманда падтрымліваць градус напалу — яны будуць падтрымліваць, калі будзе каманда аслабіць — аслабяць, калі будзе каманда ісьці на прарыў — яны пойдуць на прарыў» — тлумачыць экспэрт.

Ваенныя экспэрты не вераць, што «вайсковыя карпусы груповак «ЛДНР» здольныя на маштабныя самастойныя дзеяньні на перадавой — толькі ў зьвязку з рэгулярнымі падразьдзяленьнямі Расеі.

«Яны самастойна доўга дзейнічаць супраць Узброеных сіл Украіны не змогуць. Іх роля палягае ў тым, каб уступіць у бой, увязацца ў баявыя дзеяньні, абяскроўліваць, а ўсё астатняе даробяць падрыхтаваныя для гэтага дастаткова магутныя сілы, якія знаходзяцца за мяжой — на тэрыторыі Расейскай Фэдэрацыі» — заўважае былы намесьнік начальніка Генштаба ВСУ Ігар Раманенка.

У 2018 годзе міністар абароны Ўкраіны Сцяпан Палтарак паведаміў, што на мяжы з Украінай расейцы засяродзілі 77 тысяч вайскоўцаў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG