Расея, Кітай і, магчыма, Паўночная Карэя ўмешваюцца ў справы Злучаных Штатаў. Пра гэта прэзыдэнт ЗША Дональд Трамп заявіў падчас свайго выступу ў штаце Агаё, паведамляе тэлеканал NBC.
Паводле словаў Трампа, колькасьць падобных дзеяньняў можа ўзрасьці з-за эканамічнага росту ЗША.
«Мы павінны спыніць умяшальніцтва і ўсіх тых, хто атакуе нас», — сказаў прэзыдэнт.
NBC адзначае, што заява Трампа супярэчыць яго папярэднім выказваньням. У прыватнасьці, некалькі дзён таму кіраўнік Белага дома назваў хлусьнёй інфармацыю пра ўмяшаньні Расеі ў прэзыдэнцкія выбары ў ЗША ў 2016 годзе.
У ЗША вядзецца расьсьледаваньне магчымага ўмяшальніцтва Расеі ў прэзыдэнцкія выбары. У чацьвер, 2 жніўня, кіраўнік Нацыянальнай выведкі ЗША Дэн Коўтс заявіў, што Расея ўплывала на ўнутраныя справы ЗША праз прадстаўнікоў улады, СМІ і сацыяльныя сеткі. Ён адзначыў, што расейскі ўплыў працягваецца і мае на мэце аслабіць Злучаныя Штаты напярэдадні выбараў у Кангрэс, якія прызначаныя на лістапад.
1 жніўня Трамп запатрабаваў ад генеральнага пракурора ЗША Джэфа Сэшнса неадкладна спыніць справу аб расейскім умяшаньні. Прэзыдэнт зноў назваў гэтае расьсьледаваньне «паляваньнем на ведзьмаў», а адказнага за яго спецпрокурора Робэрта Мюлера — «ганьбай для ЗША».
Масква абвінавачваньні ў спробах паўплываць на галасаваньне ў замежных дзяржавах адхіляе.