Прэзыдэнт Вэнэсуэлы Нікаляс Мадура выступіў са зваротам да нацыі, у якім заявіў пра сваю ўпэўненасьць у тым, што пражыве яшчэ шмат гадоў пасьля спробы замаху, паведамляе Reuters.
Прэзыдэнта Вэнэсуэлы Мадуру спрабавалі забіць дронамі з выбухоўкай
Паводле словаў Мадуры, некалькі датычных да замаху ўжо затрыманыя. Ён абвінаваціў у яго арганізацыі пэўныя сілы ў Калюмбіі і ЗША і выказаў надзею на тое, што Дональд Трамп акажа дапамогу ў расьсьледаваньні спробы замаху і барацьбе з тэрарыстычнымі арганізацыямі, якія плянуюць замахі на дзяржаўных дзеячаў іншых краін з тэрыторыі ЗША.
«Гэта была спроба забіць мяне. Сёньня яны спрабавалі забіць мяне», — заявіў прэзыдэнт.
Мадура таксама сказаў, што ўсе сабраныя сьведчаньні паказваюць на тое, што змова складзена ў асяродзьдзі правых, якія працавалі сумесна з уладамі Калюмбіі. Пры гэтым ён заявіў, што прэзыдэнт Калюмбіі Хуан Мануэль Сантас таксама нясе адказнасьць за тое, што адбылося.
Раней міністр інфармацыі Вэнэсуэлы заявіў, што ў нападзе на прэзыдэнта падчас вайсковага параду ў Каракасе, прысьвечанага 81-годзьдзю войска краіны, удзельнічалі некалькі бесьпілётнікаў, начыненыя выбухоўкай. Яны былі зьбітыя, прэзыдэнт і іншыя кіраўнікі краіны не пацярпелі.
Адказнасьць за замах, паведамляе AP, узяла на сябе групоўка «флянэлевыя салдаты». Пры гэтым агенцтва удакладняе, што інфармацыя пра гэта зьявілася ў Twitter і яна мае патрэбу ў праверцы.
