Яго вывелі з калёніі ў кайданках. Паведамляецца, што гэта Максім Яблакаў.
Інфармацыю пра затрыманьне паведамілі праваабаронцы фонду «Грамадзкі вэрдыкт». Пазьней у яраслаўскім упраўленьні СК паведамілі, што Яблакава не затрымлівалі і ўдакладнілі, што няма і іншых затрыманых па гэтай справе на вечары 21 ліпеня.
Жахлівае відэа з катаваньнямі зьняволенага ў калёніі было апублікавана расейскім выданьнем «Новая газета». Відэа было зьнята на партатыўны відэарэгістратар аднаго з супрацоўнікаў калёніі.
У чэрвені мінулага года ў яраслаўскай калёніі № 1 жорстка зьбілі зьняволенага Яўгена Макарава. Сьледчы камітэт пачаў праверку. Супрацоўнікі ведамства вывучылі відэазапіс зьбіцьця, але не выявілі парушэньні закона.
На запісы відаць, як некалькі чалавек у форме Фэдэральнай службы выкананьня пакараньняў, зьняўшы з Макарава вопратку, па чарзе б’юць яго дубінкамі і паліваюць галаву вадой.
Пасьля публікацыі відэа распачалася новая праверка, а Сьледчы камітэт па Яраслаўскай вобласьці завёў крымінальную справу.
Праваабаронцам фонду «Грамадзкі Вэрдыкт» удалося высьветліць імёны і прозьвішчы 12 супрацоўнікаў калёніі, якія, як мяркуецца, удзельнічалі ў катаваньнях. Усяго ў зьбіцьці Макарава прымалі ўдзел 18 чалавек.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў