Карантын для прафіляктыкі шаленства Баранавіцкі гарвыканкам абвясьціў 10 ліпеня, піша Intex-press.
Што адбылося?
Карантын увялі з прычыны нападаў катоў на людзей. Першы напад адбыўся 6 ліпеня ў гаражным каапэратыве баранавіцкага мікрараёну Паўночны, калі кот пакусаў траіх чалавек. Адзін з пацярпелых мужчынаў забіў ката і прынёс яго ў вэтэрынарную лякарню.
На наступны дзень 7 ліпеня жыхарка гарадзкога мікрараёну Ўсходні зьвярнулася да вэтэрынараў пасьля таго, як яе пакусала свойская кошка. У абодвух выпадках спэцыялісты выявілі захворваньне на шаленства.
Што цяпер рабіць?
Цягам двух месяцаў у Баранавічах забаронена:
- вывозіць жывёлаў за межы мікрараёнаў;
- прадаваць іх на рынках.
Падчас карантыну гарадзкія ЖЭСы правядуць бясплатную вакцынацыю свойскіх жывёлаў супраць шаленства, паведаміў начальнік гарадзкой вэтэрынарнай станцыі Сяргей Нікалаеў.