Лінкі ўнівэрсальнага доступу

Сьледчы камітэт паведаміў, хто адкажа за сьмерць дзяцей на незаконнай будоўлі ў Магілёве


Гэта ня ўласьнік незаконнага будынка, які абваліўся, а чыноўнік.

1 лістапада 2017 году на двух непаўналетніх абрынулася бэтонная пліта, калі яны гулялі ў недабудаваным доме на Загараднай шашы, 31. Хлопчыкаў з-пад пліты дасталі супрацоўнікі МНС.

Дзеці гулялі ў недабудаваным доме ў Магілёве. На іх абрынулася бэтонная пліта

Адно дзіця загінула на месцы. Другое ў цяжкім стане было дастаўленае ў бальніцу, дзе памерла ад атрыманых траўмаў 13 лістапада. Пра здарэньне сваім бацькам паведаміў сябар заціснутых плітой хлопчыкаў.

Цяпер недабудаваны будынак разабраны, на яго месцы застаўся будаўнічы друз.

Недабудаваны дом пасьля трагедыі пабурылі
Недабудаваны дом пасьля трагедыі пабурылі

Згодна з высновамі камісійнай будаўніча-тэхнічнай экспэртызы, прычынаю абвальваньня пліты стала працяглае ўзьдзеяньне атмасфэрнай вільгаці на будаўнічыя канструкцыі.

Факт незаконнага ўзьвядзеньня дома выявіў Камітэт дзяржаўнага кантролю яшчэ ў 2010 годзе, але, паводле сьледзтва, чыноўнікі гарвыканкаму не прынялі своечасова рашэньня пра яго знос.

Як паведамляе Сьледчы камітэт, намесьніку начальніка ўпраўленьня архітэктуры і горадабудаўніцтва Магілёўскага гарвыканкаму выставілі абвінавачваньне ў службовай нядбайнасьці. Паводле сьледзтва, «выявіўшы факт самавольнага ўзьвядзеньня жылога дома», чыноўнік «самаўхіліўся ад ажыцьцяўленьня кантролю па сутнасьці пытаньня пра лёс будынка».

Чыноўнік знаходзіцца пад падпіскай пра нявыезд, а ягоныя дзеяньні кваліфікаваныя паводле артыкулу 428 (службовая нядбайнасьць) Крымінальнага кодэксу. Справа перададзеная пракурору для накіраваньня ў суд.

Раней у гібелі дзяцей па неасьцярожнасьці (144-ы артыкул Крымінальнага кодэксу), вінавацілі 43-гадовага жыхара Магілёва, які без адпаведнага дазволу самавольна ўзводзіў дом. Пасьля ўмяшаньня Камітэту дзяржаўнага кантролю ў 2010 годзе ён работы спыніў.

Паводле папярэдняга расьсьледаваньня, паведамляе магілёўскае абласное ўпраўленьне Сьледчага камітэту, мужчына ня мог прадбачыць гібель грамадзян з прычыны аварыйнага стану абʼекта, таму яго перасьлед спынены праз адсутнасьць складу злачынства.

У Магілёве на ўнівэрсытэцкі даўгабуд няма грошай. Будынак разбураецца

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG