Лінкі ўнівэрсальнага доступу

Справу Аляксандра Коржыча, які загінуў у войску, накіравалі ў Вярхоўны суд


У Вярхоўны суд накіравана крымінальная справа па факце сьмерці радавога Аляксандра Коржыча.

Генпракуратура вывучыла і 4 ліпеня накіравала ў Вярхоўны суд Беларусі для вызначэньня падсуднасьці крымінальную справу па абвінавачаньні трох вайскоўцаў 72-га Аб’яднанага вучэбнага цэнтру Ўзброеных сіл ва ўчыненьні злачынстваў, прадугледжаных ч. 1 арт. 205 КК (крадзеж), ч. 1 і ч. 2 арт. 430 КК (атрыманьне хабару і паўторнае атрыманьне хабару), ч. 3 арт. 455 КК (перавышэньне ўлады, якое пацягнула за сабой цяжкія наступствы).

Справу салдата Коржыча, які загінуў у войску, перадалі ў Генпракуратуру

Генпракуратура паведамляе, што пасьля праверкі матэрыялаў крымінальнай справы пракурор прыйшоў да высновы аб абгрунтаванасьці абвінавачаньня, наяўнасьці дастатковых, датычных да справы і дапушчальных доказаў вінаватасьці абвінавачаных, поўным, усебаковым і абʼектыўным дасьледаваньні акалічнасьцяў злачынства.

Пракурор пагадзіўся з крымінальна-прававой кваліфікацыяй дзеяньняў абвінавачаных. Ужытая раней у дачыненьні да абвінавачаных мера стрыманьня ў выглядзе заключэньня пад варту пакінутая пракурорам бязь зьмены. Папярэдняе расьсьледаваньне праводзілася галоўным сьледчым упраўленьнем СК Беларусі.

Тры сяржанты часткі, дзе служыў загінулы 21-гадовы ўраджэнец Пінску Аляксандар Коржыч, абвінавачваюцца ў давядзеньні яго да самагубства.

Радавога Коржыча 3 кастрычніка 2017 году знайшлі павешаным у падвале мэдычнай роты.

Сьледчыя эксгумавалі цела салдата Коржыча на патрабаваньне маці

Сьвятлана Коржыч
Сьвятлана Коржыч

Паводле вэрсіі Сьледчага камітэту, Аляксандра Коржыча «давялі да самагубства». Пры гэтым сам СК раней паведамляў, што цела знайшлі ў пятлі са зьвязанымі нагамі і нацягнутай на галаву майкай — як гэта спалучаецца з вэрсіяй пра самагубства, маці не патлумачылі.

Гвалтоўная сьмерць у Печах салдата Аляксандра Коржыча атрымала ў грамадзтве вялікі рэзананс. Былыя салдаты тэрміновай службы пачалі расказваць пра свой досьвед дзедаўшчыны і гвалту ў войску. Стала пашырацца інфармацыя пра іншыя выпадкі сьмерці маладых салдат.

Пасьля здарэньня ў вайсковай частцы ў Печах апыталі 18 тысяч дэмабілізаваных вайскоўцаў на прадмет нестатутных дачыненьняў падчас службы ў войску.

Па выніках расьсьледаваньня ў справе Коржыча былі ўзятыя пад варту 10 чалавек: два афіцэры — камандзір роты, старшы лейтэнант 1994 году нараджэньня, і ягоны намесьнік, капітан 1989 году нараджэньня, — сем сяржантаў і прапаршчык. За непрыняцьце захадаў, каб прадухіліць гібель Коржыча, з войска звольнілі пяць чалавек, яшчэ двое адхіленыя ад працы.

«Яны прададуць і дзяржаву, і Лукашэнку». У маці салдата Коржыча свая вэрсія сьмерці сына

Адбыўся таксама шэраг судоў за дзедаўшчыну, не зьвязаных са сьмерцю Аляксандра Коржыча. З пачатку 2018 году, паводле Генпракуратуры, 23 салдатаў тэрміновай службы асудзілі за гвалт у войску.

Што такое Печы і чаму адтуль шмат кепскіх навінаў?

72-і гвардзейскі аб’яднаны вучэбны цэнтар падрыхтоўкі прапаршчыкаў і малодшых спэцыялістаў — так афіцыйна называецца вайсковая адзінка ў вайсковым гарадку Печы пад Барысавам. Вучэбны корпус у Печах — найвялікшая вайсковая фармацыя ў Беларусі. Паводле «Белорусской военной газеты», у Печах больш за 4,5 тысячы асабовага складу — цэлы пасёлак, па цывільных мерках. Тут сканцэнтравана каля 10% усіх вайскоўцаў краіны (агулам у Беларусі іх 48,9 тысячы, інфармуе БелТА).

Вучэбны цэнтар у Печах існуе з 1960 году. Раней там рыхтавалі толькі малодшых камандзіраў і спэцыялістаў, а з 2001 году — яшчэ і прапаршчыкаў.

72-і вучэбны цэнтар — гэта шэсьць спэцыялізаваных школ, кожная зь якіх лічыцца асобнай вайсковай часткай. У розных школах рыхтуюць будучых танкістаў, кіроўцаў і камандзіраў БМП, снайпэраў, спэцыялістаў радыёсувязі, начальнікаў сталовых — большасьць спэцыялістаў для беларускай арміі. Усяго там навучаюць 81 спэцыяльнасьці.

Акрамя школаў, у вучэбны цэнтар уваходзяць тры вайсковыя адзінкі, дзе салдаты праходзяць паўнавартасную службу: батальён аховы і абслугоўваньня, цэнтар тэхнічнага забесьпячэньня і батальён матэрыяльнага забесьпячэньня.

Беларускае войска імя Аляксандра Коржыча

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG