1 ліпеня каля ўваходу ў забаўляльны комплекс з рэстаранам «Паедзем паядзім» міліцыя затрымала актывістку Натальлю Гарачку.
Як паведаміў БелаПАН намесьнік старшыні Беларускай сацыял-дэмакратычнай партыі (Грамада) Аляксей Сігаеў, Гарачка знаходзілася ў Курапатах каля 15 хвілінаў, пасьля чаго прыехаў мікрааўтобус, зь якога выйшлі тры чалавекі, паказалі пасьведчаньні супрацоўнікаў міліцыі, прапанавалі актывістцы праехаць зь імі.
Верагодна, Гарачку чакае суд па абвінавачаньні ў адміністрацыйным правапарушэньні, аднак, калі ён пройдзе ў сувязі з выхаднымі днямі, пакуль невядома.
Напярэдадні былі затрыманыя і арыштаваныя на 10 сутак сустаршыня аргкамітэту па стварэньні партыі «Беларуская хрысьціянская дэмакратыя» Павал Севярынец і Вольга Мікалайчык.
Севярынец, Мікалайчык і Гарачка зьяўляюцца актыўнымі ўдзельнікамі акцыі пратэсту супраць працы забаўляльнага комплексу ў Курапатах.
Акцыі супраць працы гэтай установы праходзяць з 31 траўня. У дачыненьні да многіх актывістаў складаліся пратаколы аб адміністрацыйных правапарушэньнях.
1 ліпеня каля рэстарана нясуць вахту сем чалавек.
Абаронцы Курапатаў зьбіраюцца трымаць варту каля рэстарацыі «Поедем поедим» да канца ліпеня
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў