Прэм’ер-міністар Польшчы Матэвуш Маравецкі накіраваў сьпікеру Сэйму заяву аб унясеньні паправак у закон аб Інстытуце нацыянальнай памяці, які вядомы як «закон аб Галакосьце».
Празь некалькі месяцаў пасьля прыняцьця закону польскі ўрад хоча цалкам адмовіцца ад крымінальных запісаў, якія моцна раскрытыкавалі ЗША і Ізраіль. Парушальнікам закону пагражаў штраф і турэмнае зьняволеньне тэрмінам да трох гадоў.
У Польшчы ўступіў у сілу «Закон пра Галакост»
Старшыня канцылярыі польскага прэм’ера Міхал Дворчык заявіў сёньня ў эфіры Польскага радыё, што Інстытут нацыянальнай памяці будзе змагацца зь гістарычнай хлусьнёй «грамадзянскімі і юрыдычнымі інструмэнтамі».
Паводле закону, які быў прыняты напрыканцы студзеня, кожны, хто публічна і насуперак фактам прыпісвае польскаму народу або дзяржаве поўную або частковую адказнасьць за злачынствы, учыненыя гітлераўскай Нямеччынай або іншыя злачынствы супраць чалавецтва, міру і ваенныя злачынствы — будзе пакараны штрафам або пазбаўленьнем волі тэрмінам да трох гадоў. Закон таксама дазваляе пачынаць крымінальныя справы за адмаўленьне злачынстваў украінскіх нацыяналістаў.
