Падазраваныя ў нападзе на лягер цыганоў у Львоўскай вобласьці прызналі сябе чальцамі групоўкі «Цьвярозая і злая моладзь», якая выкарыстоўвае сымболіку ўльтраправай нацыяналістычнай арганізацыі Misanthropic Division.
Пра гэта паведаміла старшы інспэктар Упраўленьня захаваньня правоў чалавека Нацыянальнай паліцыі Ўкраіны Аксана Санагурская.
Паводле яе, затрымалі 8 чалавек. Сямёра зь іх падлеткі ва ўзросце 16-17 гадоў. Усе затрыманыя знаходзяцца ў раённым аддзяленьні паліцыі з бацькамі і даюць паказаньні. У паліцыі заявілі, што тыя, хто нападаў, мелі дакладны плян пагрому лягеру цыганоў: яны загадзя вызначылі пазыцыі, дзеяньні і задачы.
Адзін чалавек загінуў і чацьвёра атрымалі нажавыя раненьні падчас нападу невядомых на лягер, у якім жылі цыганы, на ўскраіне Львова, паведамляе аддзел камунікацыі галоўнага ўпраўленьня нацыянальнай паліцыі Ўкраіны ў Львоўскай вобласьці.
У Львове падчас нападу на лягер цыганоў адзін чалавек забіты
За апошнія два месяцы гэты інцыдэнт быў пятым нападам на цыганскія абшчыны. Паводле дадзеных праваабаронцаў з Human Rights Watch і Amnesty International, з пачатку 2018 году такія ультраправыя групоўкі, як С14 і «Правы сэктар» былі стаялі за двума дзясяткамі выпадкаў фізычнага гвалту і цкаваньня цыганоў ва Ўкраіне.
Паводле дадзеных Рады Эўропы, ва Ўкраіне жыве каля 260 тысяч цыганоў.