Прэзыдэнт ЗША Дональд Трамп лічыць, што нелегальных мігрантаў неабходна дэпартаваць з краіны без судовых разглядаў. Пра гэта ён напісаў у нядзелю ў «Твітэры».
«Мы ня можам дазволіць усім гэтым людзям уварвацца ў нашу краіну. Калі нехта прыяжджае, мы павінны неадкладна, бяз судзьдзяў і судовых спраў, вярнуць іх туды, адкуль яны прыйшлі», — напісаў Трамп.
Прэзыдэнт Трамп чарговы раз выказаўся за так званую «бальную» сыстэму іміграцыі, якая базуецца на кваліфікацыі патэнцыйных мігрантаў.
«Наша цяперашняя сыстэма ёсьць пародыя на слушную іміграцыйную палітыку і прынцыпы правапарадку», — падкрэсьліў ён.
Адміністрацыя адмяніла сваё ўласнае распараджэньне аб «нулявой талерантнасьці» ў дачыненьні незаконных мігрантаў, якое прадугледжвала абавязковае іх прыцягненьне да крымінальнай адказнасьці і сэпарацыю дарослых нелегалаў зь іхнымі дзецьмі. Паводле Міністэрства ўнутранай бясьпекі, па стане на 20 чэрвеня на яго апецы заставалася звыш дзьвюх тысяч такіх дзяцей; 522 дзіцяці вернутыя бацькам.
Новы прэзыдэнцкі ўказ дазваляе ўтрымліваць дзяцей і дарослых у адным спэцпрыёмніку. Аднак у дакумэнце не прапісаны ні тэрміны ўзьяднаньня сем’яў, ні таго, ці змогуць яны ўзьяднацца ўжо на стадыі разгляду іх спраў, або толькі перад дэпартацыяй.
Дзесяць чальцоў Палаты прадстаўнікоў, адзін сэнатар і амэрыканскія славутасьці абвясьцілі галадоўку, патрабуючы адмовы Вашынгтону ад палітыкі «нулявой талерантнасьці».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў