Лінкі ўнівэрсальнага доступу

Блогера з Калінкавічаў абвінавацілі ў стварэньні фінансавай піраміды


Самыя папулярныя відэа каналу на Youtube, які вядзе Віталь Манько
Самыя папулярныя відэа каналу на Youtube, які вядзе Віталь Манько

Дэпартамэнт фінансавых дасьледаваньняў Камітэту дзяржкантролю паведаміў, што супрацоўнікі Мазырскага міжрайаддзелу спынілі незаконную дзейнасьць сацыяльнай фінансавай сеткі «Элеўрус».

Сьледчыя паведамляюць, што відэаблогер з Калінкавічаў (прозьвішча ня згадваецца, але вядома, што гэта затрыманы нядаўна Віталь Манько) разам зь некалькімі грамадзянамі Беларусі і Расеі арганізаваў у 2015 годзе на тэрыторыі рэспублікі дзейнасьць незарэгістраванай сацыяльнай фінансавай сеткі. Працавала яна паводле схемы піраміды. Грамадзянаў пераконвалі ўкладваць грошы (у тым ліку электронныя), абяцалі гарантаваны высокі даход — да 365 адсоткаў гадавых. Памер патэнцыйнага даходу ўзрастаў, калі чалавек прыцягваў у піраміду знаёмых, якія таксама ўкладвалі сродкі.

«Элеўрус» рэклямавалі ў сацыяльных сетках і на відэахостынгу ў YouTube. Кіраўнік фінансавай сеткі сустракаўся з удзельнікамі піраміды, прэзэнтаваў яе магчымасьці ў Менску, Маладэчне, Берасьці, Пінску, Баранавічах, Мазыры, Калінкавічах ды іншых гарадах.

Грошы ўкладчыкаў пераводзіліся на рахункі, якія былі адкрыты ў беларускіх банках на мэнэджараў «Элеўруса», так званых захавальнікаў. Апошнія пераразьмяркоўвалі сродкі паводле вызначаных правілаў удзелу.

У выніку арганізатар і актыўныя чальцы фінансавай сеткі атрымалі даход, які перавышае 400 тысяч рублёў.

Заведзеная крымінальная справа паводле часткі 3 артыкулу 233 КК — незаконная прадпрымальніцкая дзейнасьць, якая ажыцьцяўлялася арганізаванай групай. Арганізатару фінансавай піраміды выставілі абвінавачваньне.

Жонка Віталя Манько Валянціна паведаміла Свабодзе, што муж па-ранейшаму ўтрымліваецца ў Гомельскі СІЗА № 3. Яму чарговы раз падоўжылі ўтрыманьне пад вартаю. «Выстаўленае абвінавачваньне — гэта фабрыкацыя», — кажа Валянціна Манько.

Блогера і прадпрымальніка Віталя Манько затрымалі ў Калінкавічах 4 чэрвеня проста на вуліцы. Міліцыя правяла ў ягоным доме ператрус, забрала на праверку кампутар, мабільны тэлефон, фінансавыя дакумэнты.

Віталь і Валянціна гадуюць шасьцёра непаўналетніх дзяцей. Меншаму сыну споўнілася 2 месяцы. Апроч прадпрымальніцтва, Манько займаўся яшчэ й блогерствам. На Гомельшчыне ён стаў вядомы вострымі відэа на YouTube пра дзейнасьць мясцовых уладаў, міліцыі і ДАІ.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG