Лінкі ўнівэрсальнага доступу

Амбасада ЗША ў Менску ўпершыню вывесіла вясёлкавы сьцяг


Амбасада ЗША ў Менску 17 траўня вывесіла міжнародны сымбаль ЛГБТ-супольнасьці

У Міжнародны дзень барацьбы з гамафобіяй 17 траўня амбасада ЗША ўпершыню вывесіла вясёлкавы сьцяг у знак салідарнасьці з ЛГБТ-супольнасьцю.

«Так, амбасада вывешвала сьцяг, і гэта быў першы год», — паведамілі Радыё Свабода ў амбасадзе ЗША ў Менску.

Таксама 17 траўня, у Міжнародны дзень барацьбы з гамафобіяй, вясёлкавы сьцяг — міжнародны сымбаль ЛГБТ-супольнасьці — быў вывешаны над амбасадай Вялікай Брытаніі ў Менску.

Вясёлкавы сьцяг над амбасадай Вялікай Брытаніі ў Менску. 17 траўня 2018 году
Вясёлкавы сьцяг над амбасадай Вялікай Брытаніі ў Менску. 17 траўня 2018 году

Праз гэта 20 траўня Міністэрства ўнутраных спраў Беларусі выказала жаль.

«Як ні круці, але аднаполыя адносіны — гэта падробка. А сутнасьць падробкі заўсёды аднолькавая — абясцэньваньне ісьціны. ЛГБТ-супольнасьць і ўся гэтая барацьба за „свае правы“, і сам дзень супольнасьці — усяго толькі падробка!», — гаворыцца ў заяве, апублікаванай на афіцыйным сайце МУС.

Свой зварот МУС заканчвае словамі: «Мы за сапраўднае, яны ня пройдуць!».

Свабодзе пакуль не ўдалося высьветліць, ці адлюстроўвае гэты зварот афіцыйную пазыцыю ведамства. Тэлефоны прэсавай службы не адказваюць.

Дарадца па сувязях з грамадзкасьцю пасольства Вялікай Брытаніі ў Беларусі паведаміла Свабодзе, што амбасадарка Фіёна Гіб ня будзе камэнтаваць зварот МУС.

Старшыня Беларускага Хэльсынскага камітэту Алег Гулак у камэнтары Свабодзе расцаніў публікацыю МУС як адназначна гамафобную.

21 траўня на сайце petitions.by пачаўся збор подпісаў «За сапраўдную міліцыю для ўсіх». Ініцыятары нагадваюць, што з 1990 году гомасэксуальнасьць выключана зь Міжнароднай клясыфікацыі хвароб; цытуюць артыкул 6 закону Рэспублікі Беларусь «Аб органах унутраных спраў» — аб прамых абавязках міліцыі.

«Нідзе ў заканадаўстве не замацавана права органаў унутраных спраў выступаць з ідэалягічнымі камэнтарамі і даваць неправавыя ацэнкі асобным сытуацыям, замест выконваньня сваіх асноўных абавязкаў па папярэджаньні і раскрыцьці злачынстваў і дзейнасьці ў межах сваёй кампэтэнцыі», — падкрэсьліваюць ініцыятары звароту.

У пэтыцыі просяць праверыць законнасьць падобных выказваньняў, а таксама прыбраць гэты матэрыял з сайту і ўстрымацца надалей ад камэнтароў падобнага кшталту. Сабраныя подпісы будуць накіраваныя ў МУС і Генэральную пракуратуру Рэспублікі Беларусь.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG