Новы кіраўнік ураду Каталёніі Жуакім Тора праігнараваў перасьцярогу прэм’ера Гішпаніі Марыяна Рахоя і ўключыў ва ўрад двух зьняволеных палітыкаў і двух палітыкаў, якія ўцяклі за мяжу.
Пра гэта паведамляе El Pais.
Тора ў суботу падпісаў указ, у якім гаворыцца, што члены ягонага ўраду павінны прыняць прысягу 23 траўня ў будынку Жэнэралітэту.
Так, пасады міністраў атрымалі Жозэп Руль і Жордзі Турул, увязьненыя ў гішпанскай турме.
Луіс Пуджа, які знаходзіцца ў Брусэлі пасьля таго як улады Бэльгіі адмовілі Гішпаніі ў ягонай экстрадыцыі, павінен заняць пасаду міністра культуры. Тоні Комін, які таксама знаходзіцца за мяжой — кіраваць міністэрствам аховы здароўя.
Усяго ў новым урадзе Каталёніі 14 міністэрстваў, якія паміж сабой падзялілі партыі Junts per Catalunya і ERC.
17 траўня 55-гадовы Жуакім Тора прынёс прысягу кіраўніка ўраду Каталёніі, пазьбегнуўшы пры гэтым згадкі пра караля і Канстытуцыю Гішпаніі.
