Лінкі ўнівэрсальнага доступу

Ці запрасілі апазыцыю на менскі форум, дзе мае выступіць Лукашэнка?


Кіраўнік МЗС Беларусі Ўладзімер Макей на форуме «Менскі дыялёг» — 2017

Больш за 350 экспэртаў з больш як 40 краін сьвету зьбяруцца 23–25 траўня ў Менску на трохдзённы міжнародны форум «Менскі дыялёг». Дадатковую адметнасьць гэтай і без таго надзвычайнай па беларускіх мерках падзеі надае анансаваны ўдзел у ёй кіраўніка Беларусі Аляксандра Лукашэнкі.

Аднак некаторыя палітолягі ставяцца да «Менскага дыялёгу» даволі скептычна. Сярод іх, напрыклад, Павал Вусаў — кіраўнік Цэнтру палітычнага аналізу і прагнозаў (Варшава).

У размове са Свабодай аналітык падкрэсьліў, што «Менскі дыялёг» як плятформа «арганізуецца пры дапамозе Міністэрства замежных спраў Беларусі».

Можна лічыць, што гэта афіцыйна арганізаванае мерапрыемства

«Мы ж ведаем, што адзін з галоўных арганізатараў форуму Яўген Прэйгерман актыўна супрацоўнічае і зь міністэрствам, і непасрэдна з самім міністрам Макеем. Таму можна лічыць, што гэта афіцыйна арганізаванае мерапрыемства. Наколькі я ведаю, ніхто з апазыцыянэраў ці незалежных аналітыкаў на форум не запрошаныя. І гэта таксама паказальна», — кажа Павал Вусаў.

Павал Вусаў
Павал Вусаў

Ён таксама адзначае, што канцэпцыя, якая атрымала назву «Менскі дыялёг», цалкам укладаецца ў ідэю МЗС Беларусі. Сутнасьць ідэі — афіцыйны Менск хоча замацаваць за сабою вялікі міжнародны працэс, які нездарма атрымаў такую гучную назву, як «Хэльсынкі-2».

«Той факт, што на форуме будуць прадстаўнікі шэрагу міжнародных арганізацый, у тым ліку і АБСЭ, павінен яшчэ раз нагадаць пра неабходнасьць такой пляцоўкі менавіта ў Менску. І ў межах гэтай ідэі і будзе абмяркоўвацца бясьпека ва Ўсходняй Эўропе. Вось гэта і ёсьць тлумачэньне магчымага ўдзелу Лукашэнкі ў форуме» — падсумоўвае экспэрт.

Пра што гаварыў бы Вусаў на «Менскім дыялёгу»?

Павал Вусаў сказаў Свабодзе, што на «Менскі дыялёг» яго не запрашалі. Пра што б ён гаварыў з трыбуны, калі б яго імя ўсё ж было ў сьпісе ўдзельнікаў?

Беларусь прысутнічае ва ўсіх інтэграцыйных праектах, якія прасоўвае Крэмль

«Першая тэза — асноўнай пагрозай стабільнасьці ў рэгіёне зьяўляецца Расея. Другая — Беларусь, нягледзячы на ўсе спробы пазыцыянаваць сябе ў ролі незалежнага гульца на міжнароднай арэне, такім насамрэч ня ёсьць. Таму што яна прысутнічае ва ўсіх інтэграцыйных праектах, якія прасоўвае Крэмль. Трэцяя — падзеі ўнутры Беларусі („Несьмяротны полк“, „Начныя ваўкі“, дзейнасьць праваслаўнай царквы і яшчэ шмат што, зьвязанае з „русским миром“) паказваюць, што ўнутраная прастора Рэспублікі Беларусь не абароненая ад „русского мира“», — лічыць ён.

На думку экспэрта, нават гэтых трох рэчаў дастаткова, каб пераканацца, што Беларусь «ня можа быць пляцоўкай для далейшага паглыбленьня ці пашырэньня стабільнасьці ў рэгіёне».

Прэйгерман: наша пляцоўка — прафэсійная, а не апазыцыйная і не партыйная

Кіраўнік «Менскага дыялёгу» Яўген Прэйгерман кажа, што гэтая пляцоўка працуе дзеля таго, каб дапамагаць Беларусі быць больш інтэрнацыяналізаванай.

Яўген Прэйгерман
Яўген Прэйгерман

«І праз гэта пашыраць ролю нашай краіны, дапамагаць ёй у розных сфэрах, у тым ліку і бясьпекі. На жаль, шмат хто (а такія людзі ёсьць і сярод улады, і сярод прыхільнікаў апазыцыі) проста ня хоча, каб Беларусь адкрывалася сьвету. Яны прызвычаіліся быць манапалістамі ў кантактах з замежнікамі. Але тады пачынае функцыянаваць ня прынцып прафэсіяналізму, а прынцып закрытых каналаў і манаполіі», — лічыць ён.

Кіраўнік «Менскага дыялёгу» кажа, што сярод запрошаных да ўдзелу ў форуме ёсьць экспэрты, якіх нельга назваць праўладнымі.

«А што, Валер Карбалевіч хіба не незалежны экспэрт? А Аляксандар Класкоўскі? А Андрэй Ягораў? А Андрэй Фёдараў? А Андрэй Казакевіч? Я магу працягнуць гэты сьпіс», — кажа ён.

Яўген Прэйгерман цьвердзіць, што галоўны крытэр запрашэньня на мерапрыемства «Менскага дыялёгу» — прафэсіяналізм.

«Так, мы сапраўды не запрашаем прадстаўнікоў партыяў. Але ня толькі апазыцыйных, а праўладных таксама. І я ўжо тры гады падкрэсьліваю: наша пляцоўка прафэсійная, а не партыйная», — кажа ён.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG