У Беларусі зноў падаражэе паліва

Ад 12 траўня ў Беларусі зноў даражэе паліва, паведамляецца на сайце канцэрну «Белнафтахім». Папярэдняе павышэньне цэнаў адбылося 14 красавіка.

Кошт бэнзіну і дызэльнага паліва павялічыцца на адну капейку. Цэны пасьля падаражэньня:

• АІ-92 — 1 рубель 28 капеек за літар;
• АІ-95 — 1 рубель 36 капеек;
• АІ-98 — 1 рубель 57 капеек;
• дызэльнае паліва — 1 рубель 36 капеек.

Апошні раз паліва ў Беларусі даражэла 14 красавіка — на адну капейку. Ад пачатку году цэны на паліва паднімаюцца ўжо восьмы раз, агулам ад 8 да 18 капеек на розныя віды паліва. Цэны на дызэльнае паліва зьніжаліся двойчы – 14 і 27 красавіка.

За 2017 год цана паліва вырастала сем разоў — на 8 капеек. Згодна з архівам коштаў на паліва на сайце «Беларуснафты», у 2013–2017 гадах ніводзін від паліва ў Беларусі не таньнеў.

У канцэрне «Белнафтахім» 10 сакавіка паведамілі пра новы падыход да цэнаў на нафтапрадукты і паступовае ўраўноўваньне з расейскім рынкам. У далейшым цэны будуць карэктавацца ў залежнасьці ад зьменаў сусьветных коштаў нафты, курсу нацыянальнай валюты і падатковай нагрузкі на нафтаперапрацоўчыя камбінаты.