У Маскве адбыўся напад на будынак латвійскай амбасады. Затрыманыя два чалавекі. Пра гэта паведаміў міністар замежных спраў Латвіі Эдгар Рынкевіч у твітэры.
Рынкевіч зазначыў, што Рыга падасьць ноту расейскаму Міністэрству замежных спраў з патрабаваньнем гарантаваць бясьпеку дыпляматычнага прадстаўніцтва.
Як паведамляе сайт DELFI са спасылкай на прадстаўніка латвійскага МЗС, інцыдэнт адбыўся каля 17:30 па маскоўскім часе. Да будынка дыпмісіі падышлі пяцёра чалавек і кінулі ў будынак некалькі дымавых шашак і фаераў. Адзін з тых, хто нападаў, спрабаваў зрабіць чорнай фарбай надпіс на сьцяне будынка.
Агенцтва «Інтэрфакс» удакладняе, што затрыманыя ля будынка амбасады — актывісты незарэгістраванай партыі «Другая Расея». Суд разгледзіць іх справы 10 траўня.