Актывіст апазыцыйнай арганізацыі «Открытая Россия» Кірыл Грыгор’еў, якога затрымалі падчас пратэстаў 5 траўня ў Маскве, кажа, што пазьбег складаньня пратаколу аб затрыманьні, назваўшыся прадстаўніком праўрадавага Нацыянальна-вызвольнага руху (НОД).
Паводле актывіста, яму таксама ўдалося вывесьці з пастарунку яшчэ дзевяць чалавек.
«Калі нас прывялі ў само аддзяленьне, да нас выйшаў сяржант паліцыі, і ён сказаў: "Хто з НОД?" Я адразу ж вельмі зьдзівіўся. Мне адразу ж захацелася неяк абмацюкаць яго, паслаць куды-небудзь. Але я вырашыў паспрабаваць паглядзець, што будзе, калі сказаць, што я з НОД. Празь некалькі хвілін гэты ж сяржант паліцыі падышоў да мяне, папрасіў выйсьці ў калідор. я выйшаў у калідор. А ён папрасіў мяне скласьці сьпіс тых, хто таксама, як я, з гэтай арганізацыі , з НОД.
Яшчэ ў аўтазаку мы пачалі перапісваць дадзеныя і ствараць чацік ў Telegram. Усіх, каго я ведаў, я запісаў у гэты сьпіс. Пасьля нас усіх, каго я запісаў у сьпіс, паклікалі ў курыльню, аддалі пашпарты і дазволілі спакойна выйсьці з тэрыторыі паліцыі», — сказаў Грыгор’еў праграме Радыё Свабода «Настоящее время».
У суботу, 5 траўня, у дзясятках гарадоў Расеі прайшлі масавыя акцыі пратэсту «Ён нам не цар» супраць новага прэзыдэнцкага тэрміну Уладзіміра Пуціна. У той дзень ва ўсёй краіне затрымалі больш за 1600 чалавек.
На акцыі ў Маскве акрамя пратэстоўцаў прыйшлі «казакі», якіх раней рыхтавала да разгону мітынгу мэрыя Масквы, а таксама прыхільнікі НОД, якія разам з «казакамі» зьбівалі мітынгоўцаў. Як распавядаў карэспандэнт Радыё Свабода ў Маскве, прыхільнікаў НОД з адметнымі знакамі, якія знаходзіліся на Пушкінскай плошчы, паліцыя амаль не затрымлівала.