Лінкі ўнівэрсальнага доступу

У Львове дэпутатка гарсавету страціла працу пасьля віншаваньня Гітлера зь днём нараджэньня


Мар’яна Бацюк.

Прэсавая служба Львоўскага гарсавету паведаміла 25 красавіка, што дэпутатка гарсавету Мар’яна Бацюк, якая прадстаўляе ўкраінскую радыкальную партыю «Свабода», страціла працу: дырэктар школы № 100, дзе яна працавала настаўніцай гісторыі, уручыў ёй загад аб звальненьні і працоўную кніжку.

Раніцай 20 красавіка на старонцы Бацюк у Фэйсбуку зьявіўся запіс, у якім дэпутатка павіншавала зь днём нараджэньня Адольфа Гітлера і напісала: «Вялікі чалавек, як ні круці..».. Пасьля масавага абурэньня з гэтай нагоды пост зьнік.

Бацюк заявіла, што яе старонку ўзламалі, а сама яна не пісала паста. Але калі ў «Гарадзкім цэнтры інфармацыйных тэхналёгій» ёй прапанавалі даць ім копію архіву яе акаўнту ў Фэйсбуку, каб высьветліць, хто менавіта ўзламаў акаўнт, дэпутатка ня стала гэтага рабіць.

Пасьля гэтага Упраўленьне адукацыі Львоўскага гарадзкога савету рэкамэндавала дырэктару школы № 100 звольніць Бацюк, што і было зроблена.

«Мы не дапусьцім, каб у львоўскіх школах працавалі людзі, якія ўслаўляюць тых, хто забіваў мільёны ўкраінцаў, — заявіў з нагоды звальненьня дэпутаткі гарадзкі кіраўнік Львову Андрэй Садавы. — І Гітлер, і Сталін — гэта злачынцы, на руках якіх кроў як нашых продкаў, так і мільёнаў людзей іншых нацый. Калі настаўніца гісторыі гэтага ня ведае — ёй ня месца сярод дзяцей».

***

У ў 1995 годзе ў інтэрвію нямецкай газэце «Гандэльсблат» Аляксандар Лукашэнка сказаў: «Гісторыя Нямеччыны — гэта зьлепак у нейкай ступені гісторыі Беларусі на пэўных этапах. У свой час Нямеччына была паднятая з руін, дзякуючы вельмі жорсткай уладзе вядомага Адольфа Гітлера... Ня ўсё толькі дрэннае было зьвязана ў Нямеччыне зь вядомым Адольфам Гітлерам. Нямецкі парадак фармаваўся стагодзьдзямі, пры Гітлеру гэтае фармаваньне дасягнула найвышэйшай кропкі. Гэта тое, што адпавядае нашаму разуменьню прэзыдэнцкай рэспублікі і ролі ў ёй прэзыдэнта... Гітлер сфармаваў магутную Нямеччыну дзякуючы моцнай прэзыдэнцкай уладзе... Нямеччына паднялася дзякуючы моцнай уладзе, дзякуючы таму, што ўся нацыя здолела кансалідавацца і аб’яднацца вакол моцнага лідэра... Кіраўнік дзяржавы — прэзыдэнт, яго аўтарытэт, яго вядучая роля выходзяць на гэтым этапе на першае месца... Гэтаму вучыць нас нямецкая гісторыя».

Пазьней кіраўнік Беларусі заявіў, што не гаварыў гэтага.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG