У Х’юстане каля паўтары тысячы чалавек узялі ўдзел у пахаваньні жонкі 41- га прэзыдэнта ЗША Барбары Буш.
У царкве сьвятога Марціна ў Х’юстане сярод прысутных былі экс-прэзыдэнты Джордж Буш-старэйшы, Біл Клінтан, Джордж Буш-малодшы і Барак Абама, а таксама члены іх сем’яў. На цырымоніі прысутнічалі дзясяткі былых супрацоўнікаў амэрыканскай адміністрацыі, у прыватнасьці, былы дзяржсакратар ЗША Кандаліза Райс і былы кіраўнік Пэнтагону Робэрт Гейтс. На паніхіду прыбыла таксама цяперашняя першая лэдзі Мэланія Трамп. Дональд Трамп на пахаваньне не прыехаў, каб, як паведаміў ён у твітэры, «не ствараць нязручнасьці дадатковымі мерамі бясьпекі».
Барбара Буш памерла на 93-ым годзе жыцьця. Яна пакутавала ад хранічных захворваньняў лёгкіх і сэрца. Былую першую лэдзі ЗША пахавалі на тэрыторыі бібліятэкі імя Джорджа Буша-старэйшага.
Барбара Буш была першай лэдзі з 1989 па 1993 год, калі яе муж — Джордж Буш-старэйшы — быў 41-м прэзыдэнтам ЗША. Сёньня яму 93 гады і яго здароўе ў апошнія гады таксама пагоршылася.
Барбара Буш — маці Джорджа Буша-малодшага, 43-га прэзыдэнта ЗША, і былога губэрнатара Флорыды Джэба Буша. Яна карысталася любоўю сярод жыхароў ЗША за сваю мудрасьць у дачыненьні да мужа і двух сыноў. Калі Джордж Буш-малодшы быў прэзыдэнтам яе называлі Першай маці ЗША.
