Лінкі ўнівэрсальнага доступу

Камандзір пажарных адпрэчвае віну ў гібелі дзясяткаў людзей у Кемераве


Пажар у гандлёвым цэнтры «Зімовая вішня»

Камандзір атраду, які гасіў пажар у гандлёвым цэнтры «Зімовая вішня» ў расейскім горадзе Кемерава, не прызнае віны ў нядбайнасьці, якая прывяла да гібелі людзей. Пра гэта перадае агенцтва «Интерфакс».

Сяргей Генін заявіў 12 красавіка ў судзе, што пажарныя выратавалі аднаго чалавека з кіназалі, але загінулі б самі, калі б ня выйшлі.

Генін таксама адзначыў, што да сходаў пажарных вёў работнік будынку. Пры гэтым, паводле слоў ратавальніка, супрацоўнікі гандлёвага цэнтру не дапамагалі яго калегам.

«Вінаватым сябе не лічу. У мяне два вухі, крычалі чалавек 20», — сказаў Генін.

Сяргей Генін падчас пажару ў «Зімовай вішні» узначальваў зьвяно газадымаахоўнай службы і, паводле вэрсіі сьледзтва, праігнараваў інфармацыю пра тое, што на чацьвёртым паверсе гандлёвага цэнтру знаходзяцца дзясяткі людзей, у ліку якіх былі дзеці.

У Сьледчым камітэце Расеі сьцьвярджаюць, што праз халатнасьць Геніна загінулі ня менш як 37 чалавек. У Міністэрстве надзвычайных сытуацый Расеі настойваюць, што Генін дзейнічаў паводле статуту.

Пажар у Кемераўскай гандлёвым цэнтры «Зімовая вішня» адбыўся 25 сакавіка. Паводле афіцыйных дадзеных, загінулі 64 чалавекі, у іх ліку больш за 40 дзяцей. Паведамлялася, што ў гандлёвым цэнтры ў момант узгараньня не спрацавала пажарная сыгналізацыя, а многія эвакуацыйныя выхады былі заблякаваныя.

Па справе аб пажары ў «Зімовай вішні» арыштаваныя ўжо сем чалавек.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG