Лінкі ўнівэрсальнага доступу

Пудждэмон будзе часова жыць у Бэрліне. Гішпанія сьцьвярджае, што хацеў уцячы ў Расею


Былы лідэр Каталёніі Карлес Пудждэмон, экстрадыцыі якога дамагаецца Гішпанія, разглядаў магчымасьць адправіцца ў Расею, каб схавацца ад перасьледу. Гэтак сьцьвярджае гішпанская газэта El Mundo са спасылкай на ўласныя крыніцы.

Як піша газэта, Пудждэмон ў канцы сакавіка, знаходзячыся ў Гэльсынкі, даведаўся пра тое, што ў Гішпаніі выдадзены эўрапейскі ордэр на ягоны арышт. Ён разглядаў магчымасьць выехаць у Расею, якая мяжуе зь Фінляндыяй, аднак палічыў за лепшае паспрабаваць на аўтамабілі вярнуцца ў Бэльгію, дзе ён з канца леташняга году жыве ў эміграцыі. Пудждэмон праз Швэцыю і Данію даехаў да Нямеччыны, дзе быў затрыманы.

Суд у Нямеччыне адмовіўся экстрадаваць Пудждэмона паводле артыкулу аб «мецяжы», аднак яму па-ранейшаму пагражае выдача ў Гішпанію паводле артыкулу аб марнаваньні дзяржсродкаў. Пудждэмон вызвалены пад заклад, ён не павінен пакідаць межы Нямеччыны.

У суботу каталёнскі лідэр на прэс-канфэрэнцыі ў Бэрліне заявіў, што мае намер падчас працэсу па справе аб экстрадыцыі жыць у сталіцы Нямеччыны, а пасьля, калі атрымае такі дазвол, вярнуцца ў Бэльгію. Ён зноў заклікаў улады Гішпаніі да «дыялёгу» з каталёнскім палітыкамі. Паведамленьні аб магчымым ад’езьдзе ў Расею Пудждэмон не камэнтаваў.

У Гішпаніі Пудждэмона абвінавачваюць у мецяжы ў сувязі з правядзеньнем рэфэрэндуму аб незалежнасьці Каталёніі, які Мадрыд прызнаў незаконным. Каталёнскі парлямэнт пасьля прыняцьця дэклярацыі аб незалежнасьці быў распушчаны, аднак новыя выбары зноў далі перавагу прыхільнікам незалежнасьці.



Былы лідэр Каталёніі выйшаў на волю

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG