Лінкі ўнівэрсальнага доступу

Як глушылі сувязь 25 сакавіка. Экспэрт у інфабясьпецы: «Дастаткова грузавіка з апаратурай»


Вежа мабільнай сувязі. Ілюстрацыйнае фота.

Кіраўнік аддзелу інфармацыйнай бясьпекі адной з буйных IT-кампаній пры ўмове ананімнасьці расказаў Свабодзе, што стала з мабільнай сувязьзю 25 сакавіка ў раёне Опэрнага тэатру паміж 12 і 19 гадзінамі. Спэцыяліст таксама быў у названы час у гэтым раёне і зазнаў нязручнасьці на сабе.

«25 сакавіка ля Опэрнага была сувязь, але зь вельмі нізкай хуткасьцю, — кажа ён. — Час ад часу яна ўвогуле перарывалася. Як быццам трапляеш у яму».

Тое самае адбывалася з тысячамі мабільнікаў удзельнікаў сьвята і журналістаў, якія спрабавалі перадаваць інфармацыю і адсылаць фота ў свае рэдакцыі, а таксама весьці жывую трансьляцыю зь месца сьвяткаваньняў. Не працавала нават адмысловае абсталяваньне для трансьляцый, разьлічанае на слабы сыгнал.

Хуткасьць мабільнага інтэрнэту падчас канцэрту ля Опэрнага 25 сакавіка 2018
Хуткасьць мабільнага інтэрнэту падчас канцэрту ля Опэрнага 25 сакавіка 2018

«Вышкі адключаліся дыстанцыйна»

«Мабільная сувязь каля Опэрнага банальна глушылася адключэньнем найбліжэйшых вышак, — кажа спэцыяліст. — Такая інфармацыя да мяне даходзіла. Людзі, якія працуюць у кампаніях — апэратарах мабільнай сувязі (калегі, так скажам), атрымалі заданьне адключыць пэўныя пункты на пэўны час».

Паводле экспэрта, адключыць вышкі мабільнай сувязі ў Менску можна дыстанцыйна. Для гэтага ня трэба прыходзіць і выключаць на ёй рубільнік. Усё робіцца з офісу, праз кампутар. Адключаецца перадача дадзеных, пакідаецца толькі сувязь для кіраваньня абсталяваньнем вышкі.

«Таксама існуюць тэхналёгіі, якія дазваляюць глушыць мабільную сувязь на пэўнай тэрыторыі без удзелу кампаніі-апэратара, — працягвае спэцыяліст. — Гэта дастаткова магутная апаратура. Аказвае ўзьдзеяньне ня толькі на радыёхвалі пэўнай частаты, але і на прылады, якія працуюць на падобных, блізкіх частотах».

Па ацэнках праваабаронцаў на пляцоўцы ля Опэрнага адначасова знаходзілася каля 11 тысяч чалавек
Па ацэнках праваабаронцаў на пляцоўцы ля Опэрнага адначасова знаходзілася каля 11 тысяч чалавек

На практыцы гэта азначае, што ў радыюсе некалькіх кварталаў пад узьдзеяньнем такога абсталяваньня будуць дрэнна працаваць тэлевізары, Wi-Fi і нават лядоўні. Таму для абмежаваньня магчымасьці карыстацца мабільнымі тэлефонамі прасьцей выкарыстаць варыянт з адключэньнем вышак.

«Гэта больш практычны спосаб, — кажа экспэрт. — Варыянт з уласным абсталяваньнем выкарыстоўваюць, калі сувязь трэба заглушыць хутка, гарантавана і бязь лішніх размоваў з прадстаўнікамі кампаніі-апэратара, на якія таксама патрэбен час. Альбо калі ўвогуле таемна гэта трэба зрабіць. Тады дастаткова аднаго грузавіка з апаратурай — і 2-3 кварталы будуць бяз сувязі».

Скаргаў на перабоі ў працы тэлевізараў і прыватных Wi-Fi-сетак у раёне Опэрнага 25 сакавіка не было. Затое гучалі меркаваньні, што праблема з мабільнай сувязьзю каля Опэрнага зьявілася празь вялікую колькасьць людзей, што прыйшлі сьвяткаваць 100-годзьдзе абвяшчэньня незалежнасьці БНР. Экспэрт у галіне інфармацыйнай бясьпекі ставіцца да такой вэрсіі скептычна.

«Колькасьць людзей, якія зьбіраюцца ў адным месцы, таксама ўплывае на якасьць мабільнай сувязі, — кажа спэцыяліст. — Павялічваецца нагрузка на перадатчыкі, і найбліжэйшыя да вялікай колькасьці людзей вышкі не ўпраўляюцца з патокам дадзеных. Людзі звоняць, адсылаюць фота праз інтэрнэт, робяць стрымы. Аднак апэратары ўжо навучыліся гэта пераадольваць. Тэхналёгія QoS пераразьмяркоўвае трафік паміж некалькімі пунктамі. Яна дазваляе бачыць, які кантэнт і па якім канале сувязі прапускаць, якія пункты найбольш загружаныя, а якія ня вельмі».

Па словах спэцыяліста, такія тэхналёгіі працуюць у аўтаматычным рэжыме. Умяшаньне чалавека неабходнае толькі тады, калі нагрузка сапраўды гіганцкая.

«Апэратары даўно навучыліся спраўляцца з колькасьцю чалавек і ў 5 тысяч у адным месцы, і ў 10 тысяч, — кажа экспэрт. — Пляцоўка ля Опэрнага для іх дакладна не праблема».

Пляцоўка ля Опэрнага з вышыні 100 мэтраў. Здымкі з бесьпілётніка.
Пляцоўка ля Опэрнага з вышыні 100 мэтраў. Здымкі з бесьпілётніка.

«Узламалі ня сам дрон, а пульт кіраваньня»

25 сакавіка ў раёне Опэрнага тэатру зьніклі прынамсі два дроны, якія здымалі відэа для парталу TUT. BY і тэлеканалу «Белсат». Арганізатары канцэрту і мітынгу «Сьвята Незалежнасьці» дапусьцілі, што гэта адбылося праз хакерскую атаку.

«Дроны магчыма і перахапіць, і прымусова пасадзіць, — кажа спэцыяліст. — Усё залежыць ад мадэлі дрона, яго прашыўкі і абсталяваньня, якое працуе супраць дрона. Дроны старых мадэляў лёгка ўзламаць. Сучасныя складаней».

Па яго словах, шляхоў узлому бесьпілётнікаў два. Першы — узлом пульта кіраваньня дронам, другі — узлом самога дрона. Усё гэта робіцца на адлегласьці, ніхто за плячыма не стаіць. Дастаткова 200–300 мэтраў. Ідэальна — зьверху, аднак на роўнай пляцоўцы можна перахопліваць сыгналы з пульта і па гарызанталі.

«Сам дрон узломваюць, калі трэба перахапіць яго сыгнал, — кажа экспэрт. — Узломваецца дрон, блякуецца сыгнал, які ён дасылае на пульт кіраваньня. Затым яму дасылаюць свае сыгналы кіраваньня, якія дазваляюць пасадзіць бесьпілётнік побач з сабой».

У выпадку з узломам пульта кіраваньня ўсё нашмат прасьцей і эфэктыўней. З дапамогай адмысловага абсталяваньня блякуюцца сыгналы, якія апэратар дрона дасылае на свой бесьпілётнік. Пасьля гэтага квадракоптэр перастае «разумець», што яму рабіць, і спрабуе самастойна сесьці ў бліжэйшым зручным месцы.

«У гэтым выпадку дрон можна паспрабаваць „падмануць“, — гаворыць спэцыяліст. — Трэба яго „пераканаць“, што пульт узломшчыка — гэта яго „родны“ пульт кіраваньня. Калі гэта ўдасца зрабіць, то таксама можна кіраваць узламаным дронам і пасадзіць яго там, дзе трэба ўзломшчыку».

Гісторыя аднаго дрона, які сагналі, але ён вярнуўся дадому
пачакайце

No media source currently available

0:00 0:00:59 0:00

Па словах экспэрта, атака на пульт кіраваньня дрона апраўданая для новых мадэляў бесьпілётнікаў. У першую чаргу таму, што яны маюць добра зашыфраваныя каналы сувязі з боку дрона, і іх пульт узламаць значна прасьцей.

«У выпадку з тым дронам, які ўдалося ўратаваць 25 сакавіка, хутчэй за ўсё, была менавіта такая сытуацыя, — мяркуе спэцыяліст. — Узломшчыкам не ўдалося займець кантроль над самім дронам, яны здолелі ўзламаць толькі пульт. Пра гэта сьведчыць і тое, што апэратар страціў сувязь са спадарожнікамі сыстэмы GPS. Сыгнал зь іх ідзе менавіта на пульт кіраваньня, а потым ужо перадаецца на дрон».

Па словах спэцыяліста, сфатаграфаваная на даху «дома Чыжа» прылада вельмі нагадвае скіраваную Wi-Fi антэну, якую можна выкарыстоўваць у тым ліку для ўзлому пульта кіраваньня дрона.

«Такая антэна нагадвае тэлескоп, я сам імі карыстаўся, — кажа спэцыяліст. — Яны „б’юць“ нават на 5 кілямэтраў. На адлегласьці 2 кілямэтры сыгнал увогуле выдатны».

Невядомая прылада на даху 25 сакавіка 2018
Невядомая прылада на даху 25 сакавіка 2018

Прадстаўнікі мабільных апэратараў адмаўляюць адключэньне сувязі ў раёне Опэрнага тэатру з 12 да 19 гадзіны 25 сакавіка.

Па інфармацыі Свабоды, такія ж праблемы з сувязьзю 25 сакавіка ўзьніклі каля 11-й гадзіны ў раёне, дзе жыве Мікалай Статкевіч. Акурат у гэты час адбывалася затрыманьне палітыка.

Па стане на 4 красавіка дроны, якія здымалі відэа для парталу TUT. BY і тэлеканалу «Белсат», уладальнікам не вярнулі. Яны зьвярнуліся з заявамі аб крадзяжы абсталяваньня ў міліцыю.

Таямнічая прылада на даху. Як у Дзень Волі над Опэрным выкрадалі дроны

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG