Лінкі ўнівэрсальнага доступу

The Telegraph: Расейскія тэлеканалы праз Брытанію трансьлююць прапаганду


Ілюстрацыйнае фота

Тэлеканалы з Расеі празь Вялікую Брытанію распаўсюджвалі «тэорыі змовы» аб атручэньні Скрыпаля, піша The Telegraph. Амбасадар Латвіі ў Лёндане заяўляе, што брытанскаму нагляднаму органу трэба прыняць меры.

Тэлевізійныя каналы, якія належаць Расеі, маглі выкарыстоўваць Вялікую Брытанію ў якасьці цэнтру для распаўсюджваньня прапагандысцкіх ідэй і «тэорый змовы» што тычыцца нядаўняга атручваньня былога двайнога агента Сяргея Скрыпаля ў Солсбэры. Пра гэта ў нядзелю, 25 сакавіка, паведаміла The Telegraph. Паводле дадзеных выданьня, два каналы, якія валодаюць ліцэнзіяй брытанскага нагляднага ведамства Ofcom i зарэгiстраваныя ў Лёндане — Ren TV і НТВ, перадавалі падобныя праграмы з Расеі ў краіны былога СССР, у прыватнасьці ў Латвію.

Перадачы выклікаюць «сур’ёзную занепакоенасьць» у саюзьнікаў Вялікай Брытаніі ў краінах, суседніх з Расеяй, бо ўяўляюць сабой «кампаніі па моцнай дэзінфармацыі». Было выяўлена, што канал парушыў правілы Ofcom восем разоў за апошнія шэсьць гадоў, але працягвае працаваць, а ягоная брытанская ліцэнзія не адкліканая. Сярод іншых парушэньняў — заклік да гледачоў падпісаць пэтыцыю, якая ініцыюе рэфэрэндум па зьмене канстытуцыі Латвіі, а таксама ілжывае сьцьвярджэньне аб тым, што ініцыятыва была ўхваленая латвійскім выбаркамам.

Амбасадар Латвіі ў Вялікай Брытаніі Байба Бражэ сказала, што ведамству Ofcom неабходна «рабіць больш» для вырашэньня гэтых задач, а таксама заклікала да зьменаў у правілах Эўразьвязу, якія маглі б дазволіць умешвацца ў канфліктныя сытуацыі мясцовым рэгулятарам.

Правілы Эўразьвязу дазваляюць вяшчальнікам трансьляваць свае перадачы на тэрыторыі ўсіх краін-чальцоў, нават калі тэлеканалы зарэгістраваныя толькі ў адной дзяржаве. Рэгулятар у «краіне паходжаньня», у дадзеным выпадку ў Вялікай Брытаніі, нясе выключную адказнасьць за кантроль за кожнай зарэгістраванай вяшчальнай кампаніяй незалежна ад таго, дзе перадаюцца праграмы. На думку Браже, Russia Today трансьлявала «чыстую прапаганду».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG